«Chelsi» bosh murabbiyi Frenk Lempard jamoa o‘z yo‘lidan borishini, «Liverpul» va «Manchester Siti» uslubini ko‘chirmasligini ma’lum qildi.

«Voqealar rivojidan ilgarilab ketmoqchi emasman. «Liverpul» va «Manchester Siti» klublari qanday natijaga erishgani tushunarli. Ular bilan oradagi farqni tezda qisqartiramiz, desak, ahmoqlik qilgan bo‘laman. Chunki bu klublar top-o‘yinchilar va ajoyib murabbiylarni taklif qilib, ulkan ishni amalga oshirishdi.

Biz ham bu jarayonni bosib o‘tishimiz kerak. Biz o‘z yo‘limizdan borishimiz kerak, o‘zgalarning yo‘lidan nusxa olishimiz kerak emas. «Chelsi» safida tajribali o‘yinchilar bor. Ular yoshlarga yordam berishadi. Lekin ba’zi pozisiyalarni kuchaytirishimiz kerak... Ba’zi pozisiyalarni mustahkamladik, ammo hali qiladigan ishlarimiz bor.

Jahonda yuzaga kelgan vaziyat tufayli rejalashtirish qiyin bo‘lib qoldi. Lekin biz to‘g‘ri yo‘ldan harakat qilganimizni his qilyapman. Balki muhim pozisiyalarga yangi o‘yinchilarni xarid qilarmiz. Ular bizga peshqadamlar bilan farqni qisqartirishda yordam beradi. Ishonchim komil, «Liverpul» va «Man Siti»ga raqobat tug‘dira olamiz», – dedi Lempard.

Eslatib o‘tamiz, «Chelsi» fevral oyida «Ayaks» yarim himoyachisi Hakim Ziyoshning transferini e’lon qilgan edi.