1867 yili jurnalist, havaskor sportchilar klubi a’zosi Jon Grexem Chembers o‘sha davrda London chempionati uchun bir qator qoidalar ishlab chiqdi. Uni Jon Sholto Duglas, ya’ni Kuinsberri 9-markizi qo‘llab-quvvatlagan. O‘shandan beri ushbu qoidalar uning nomi bilan bog‘lanib keladi.

Demak, Kuinsberri markizi qoidalari bilan tanishamiz (1867 yil).

U 12 banddan iborat edi:

— jang 24 futlik kvadrat maydonda o‘tkazilishi lozim;

— bo‘g‘ish, tanasi bilan raqibni itarib yuborish, oyog‘idan chalish, bosh bilan zarba berish, tirsak va tizza bilan zarba berishlar taqiqlanadi;

— har bir raund uch daqiqadan, bir daqiqalik tanaffus bilan davom etadi;

— agar bokschilardan biri yiqilsa, 10 soniya ichida birovning yordamisiz o‘rnidan turishi lozim bo‘ladi. Bu vaqtda raqib o‘z burchagi tomon borishi kerak. Yiqilgan bokschi o‘rnidan turganidan so‘ng jang davom ettiriladi. Agar 10 soniya ichida bokschi jangni davom ettira olmasa, hakam unga mag‘lubiyat yozadi;

— kanatlarga osilib olgan bokschi yiqilgan deb hisoblanadi;

— sekundantlar yoki boshqa kimdir raundlar vaqtida ringga chiqishi mumkin emas. Bokschilardan tashqari faqat referi ringda bo‘lishi mumkin;

— bokschilar charmli, yaxshi sifatli, bir hil vaznga ega qo‘lqoplarda jang qilishi lozim;

— agar qo‘lqop yirtilib ketsa yoki foydalanib bo‘lmaydigan holga kelsa referining talabiga ko‘ra u almashtirilishi lozim;

— tizzasi yerga tekkan bokschi yiqilgan deya hisoblanadi;

— poshnasi bor oyoq kiyimlardan foydalanish taqiqlanadi;

— jang bokschilardan birining g‘alabasi bilan yakunlanadi (agar bokschilarga pul tikkanlar rozi bo‘lsa durang ham bo‘lishi mumkin);

— boshqa holatlarda "London ringi mukofoti qoidalari"dan foydalanish;

O‘sha vaqtgacha boks qoidalari biroz boshqacharoq bo‘lgan. Albatta o‘sha vaqtdan buyon ba’zi qoidalarda biroz o‘zgarishlar bo‘lgan. Lekin, ko‘rib turganingizdek, bugungi boks qoidalarining asosi 1867 yilda ishlab chiqilgan ekan.

O‘zbekiston boks federasiyasi matbuot xizmati