20 aprel: “Lids” – “Galatasaroy”

Ha, aynan shu jamoalar o‘rtasidagi tarixiy uchrashuv. 2000 yilgi UYEFA kubogi yarim finali, javob bahsi.

“Lids Yunayted”ning oltin davri, “Galatasaroy”ning ham.

Lidsliklar boshqa yurtlarda ham muxlislariga ega bo‘lib, tarkibining yoqimtoyligi bilan Yevropani zabt eta boshlagandi. Biroq, yarim finalda uning qarshisida bu masalada ingliz klubiga yetarlicha bosh og‘riq bo‘ladigan Istanbul klubi chiqib qoldi. “Galatasaroy”ning o‘sha davr tarkibi ham zo‘r edi. Mahalliy yigitlar ham, George Xadji kabi legionerlari ham.

Birinchi o‘yin Istanbulda o‘tgan, unda turklar 2:0 hisobida g‘alaba qozonganishgan. Tabiiyki, javob o‘yinida agar “Galatasaroy” gol ursa, “Lids” ertagi tugardi. Shunday bo‘ldi ham.

Hoqon Shukurga nisbatan ishlatilgan qo‘pollik penalti bilan tugadi. Hadji hisobni ochdi.

Bakke tomonidan berilgan javob stadionga to‘planganlarni sal bo‘lsa ham tinchlantirdi. Biroq, Hoqon tanaffusga chiqish arafasida yana “Galatasaroy”ni oldinga olib chiqqani yodimizda. Bakkening yana bir goli “Lids” stadioniga kelgan 40 mingga yaqin ishqibozni o‘yindan rozi qildi, xolos.

Bu ikki klub o‘rtasidagi to‘qnashuv katta janjallar bilan esga olinadi. Muxlislar o‘rtasidagi to‘qnashuv, ikki odamning vafoti. Turklarni Angliyaga qo‘yilmagani. “Galatasaroy” aynan shu bahsda g‘alaba qozongach, finalda ham tumanli Albionning boshqa jamoasi mag‘lub etilishi mumkinligiga ishona boshlagandik o‘shanda. U voqea ham sodir bo‘ldi.

“Galatasaroy” penaltilar seriyasida “Arsenal”ni yer tishlatdi. UYEFA kubogi Istanbulga ravona bo‘ladigan oqshomga hali sal bor. Asr avvalidagi turk ertagining boshlanishi esa, aynan bugungi sanaga borib taqaladi.

Xayrulla Hamidov.