20 апрель: “Лидс” – “Галатасарой”

Ҳа, айнан шу жамоалар ўртасидаги тарихий учрашув. 2000 йилги УЕФА кубоги ярим финали, жавоб баҳси.

“Лидс Юнайтед”нинг олтин даври, “Галатасарой”нинг ҳам.

Лидсликлар бошқа юртларда ҳам мухлисларига эга бўлиб, таркибининг ёқимтойлиги билан Европани забт эта бошлаганди. Бироқ, ярим финалда унинг қаршисида бу масалада инглиз клубига етарлича бош оғриқ бўладиган Истанбул клуби чиқиб қолди. “Галатасарой”нинг ўша давр таркиби ҳам зўр эди. Маҳаллий йигитлар ҳам, Георге Хаджи каби легионерлари ҳам.

Биринчи ўйин Истанбулда ўтган, унда турклар 2:0 ҳисобида ғалаба қозонганишган. Табиийки, жавоб ўйинида агар “Галатасарой” гол урса, “Лидс” эртаги тугарди. Шундай бўлди ҳам.

Ҳоқон Шукурга нисбатан ишлатилган қўполлик пенальти билан тугади. Ҳаджи ҳисобни очди.

Бакке томонидан берилган жавоб стадионга тўпланганларни сал бўлса ҳам тинчлантирди. Бироқ, Ҳоқон танаффусга чиқиш арафасида яна “Галатасарой”ни олдинга олиб чиққани ёдимизда. Баккенинг яна бир голи “Лидс” стадионига келган 40 мингга яқин ишқибозни ўйиндан рози қилди, холос.

Бу икки клуб ўртасидаги тўқнашув катта жанжаллар билан эсга олинади. Мухлислар ўртасидаги тўқнашув, икки одамнинг вафоти. Туркларни Англияга қўйилмагани. “Галатасарой” айнан шу баҳсда ғалаба қозонгач, финалда ҳам туманли Альбионнинг бошқа жамоаси мағлуб этилиши мумкинлигига ишона бошлагандик ўшанда. У воқеа ҳам содир бўлди.

“Галатасарой” пенальтилар сериясида “Арсенал”ни ер тишлатди. УЕФА кубоги Истанбулга равона бўладиган оқшомга ҳали сал бор. Аср аввалидаги турк эртагининг бошланиши эса, айнан бугунги санага бориб тақалади.

Хайрулла Ҳамидов.