«Lill» prezidenti Jerar Lopes muddatidan oldin yakunlangan Fransiya chempionatidagi o‘rinlarni aniqlashda ilmiy uslubdan foydalanish taklifini berdi.

«Nazarimda, mavsum muddatidan avval bekor qilingani uchun uni hozirgi holatida qabul qilib bo‘lmaydi. Biz o‘rganib chiqdik: so‘nggi 10 yilda oxirgi 10ta tur davomida 71% jamoalar o‘z o‘rinlarini o‘zgartirishgan. Kafolat beraman, agar mavsum davom ettirilganida biz Chempionlar ligasi yo‘llanmasini qo‘lga kiritgan bo‘lar edik. Ushbu to‘xtalish tufayli klublarning kimga qarshi, uydami yoki safardami, yoxud mavsumning qaysi paytida o‘ynaganini inobatga olmaydi. Masalan, Biz «PSJ»ga qarshi 2 marta o‘ynaganmiz. Bizdan 1 ochko oldinda borayotgan «Renn» esa faqat bir marta. Bu adolatdanmi?

Men yakuniy o‘rinlarni shakllantirishda ilmiy uslubdan foydalanishni taklif qilaman. Ushbu mavsumdagi 28ta tur o‘yinlarini uyda va safarda qo‘lga kiritilgan natijalar nuqtai nazaridan tahlil qilib, buni qolgan 10ta turga joriy qilib, yakuniy natijani yuzaga keltirish mumkin», — dedi Lopes "Daily Mail" nashriga bergan intervyusida.

Ma’lumot o‘rnida. Fransiya chempionati to‘xtatilgan paytda "Lill" 49 ochko bilan 4-o‘rinni egallab turgan edi. Bu o‘rin esa Yevropa ligasiga yo‘llanma beradi. Chempionlar ligasiga yo‘llanma beradigan 3-pog‘onani "Renn" 50 ochko bilan band etib turibdi.