Bilbaoning «Atletik» klubi UYEFA tomonidan Ispaniya qirollik futbol federasiyasiga yuborilgan tavsiyaga nisbatan o‘z noroziligini bildirdi.

UYEFA tavsiyasiga ko‘ra, agar mamlakat kubogi yakuniga yetkazilmaydigan bo‘lsa, Yevropa ligasi uchun yana bir yo‘llanma turnir jadvalidan kelib chiqib (Ispaniyada 7-o‘rin) aniqlanadi. Ispaniya kubogi finaliga chiqqan "Atletik" esa jadvalda 11-o‘rinni egallab turibdi.

Avvalroq Ispaniya futbol federasiyasi, agar mavsum oxiriga yetkazilmasa, «Atletik» Yevropa ligasida ishtirok etishini taxmin qilgan edi. Chunki, Ispaniya kubogining ikkinchisi finalchisi «Real Sosyedad» jadvalda 4-o‘rinni egallab turgani bois, u Chempionlar ligasi yo‘llanmasiga ega bo‘ladi.  

«Biz UYEFAning qaroridan keskin norozimiz. Tashkilot 125ta jamoa ishtirok etadigan Kubok finalchisidan ko‘ra, chempionatda 7-o‘rinni egallab turgan klubni ustun hisoblamoqda», — deyiladi «Atletik» klubi matbuot xizmati tarqatgan xabarda.

Eslatib o‘tamiz, "Atletik" va "Real Sosyedad" o‘rtasidagi Ispaniya kubogi final bahsi 18 aprel kuni Sevilya shahrida o‘tkazilishi kerak edi. Ushbu bahs endi 5 avgust kuni bo‘lib o‘tishi mumkin.