«Beshiktosh» yarim himoyachisi Kevin-Prins Boateng mavsumning qayta boshlanishiga tayyor ekanini namoyish qildi.
"Milan" va "Barselona" klublarining sobiq futbolchisi istanbulliklarning mashg‘uloti paytida fantastik gol urdi. Ganalik futbolchi uzatilgan to‘pni tovoni bilan o‘ziga bo‘ysundirib, uni yerga tushirmasdan jarima maydoni tashqarisidan darvoza tomon tepdi. To‘p esa "to‘qqizlik"ka borib tushdi. Jamoadoshlari bu golni juda qizg‘in qarshi olishdi.
"O‘ylashimcha, men tayyorman!", deya izoh yozdi Boateng Tvitterga ushbu vaziyat lavhasini joylar ekan. Eslatib o‘tamiz, 33 yoshli futbolchi huquqiy jihatdan "Fiorentina"ga tegishli.
Ma’lumot o‘rnida. Turkiya chempionati 12 iyun kuni qayta start oladi. «Beshiktosh» 26-turdan keyin Superliga jadvalida 5-pog‘onani egallab turibdi.