Xabaringiz bor, joriy yilning oktyabr oyida mamlakatimiz yoshlar o‘rtasidagi Osiyo chempionatiga mezbonlik qiladi.

Mazkur musobaqada Timur Kapadze boschiligidagi O‘zbekiston U19 terma jamoasi ham ishtirok etadi. Hozirda ushbu terma jamoamiz vakillari yuzaga kelgan qisqa tanaffusdan so‘ng ikkinchi tayyorgarlik yig‘inini o‘tkazmoqda.

TTYMI stadionida bo‘lib o‘tgan bugungi mashg‘ulot jarayonini O‘FA birinchi vise-prezidenti Ravshan Ermatov ham kuzatib bordi.

Ravshan Ermatov futbolchilarning jismoniy holati, kayfiyati va mavjud sharoitlar bilan yaqindan tanishdi.

Shuningdek, O‘FA birinchi vise-prezidenti o‘zining jahon futbolidagi tajriba va ko‘nikmalarini yosh futbolchilar bilan o‘rtoqlashdi.

Ularga bo‘lajak Osiyo chempionatida muvaffaqiyatli ishtirok etib, Jahon chempionati yo‘llanmasi hamda chempionlikni qo‘lga kiritishda omad tiladi.

Eslatib o‘tamiz, O‘zbekiston U19 terma jamoasi Osiyo chempionati guruh bosqichi doirasida Eron, Indoneziya va Kamboja vakillariga qarshi maydonga tushadi.