«Yuventus» hujumchisi Krishtianu Ronalduning 10 yoshli o‘g‘li mustaqil gidrosikl boshqarayotgani videosi internetda tarqalganidan so‘ng Madeyra oroli polisiyasi ushbu holat yuzasidan surishtiruv ishlarini boshladi.

Ushbu videoni Ronalduning opasi Elma internetga joylab, so‘ngra o‘chirib tashladi. Portugaliya matbuoti tarqatgan xabarga ko‘ra, ushbu video Madeyraning janubida joylashgan Paul-du-Marda shanba kuni olingan bo‘lib, u yerda 10 yoshli Krishtianu qarindoshlari bilan dam olgan edi.

Madeyra dengiz polisiyasi boshlig‘i Gerreyru Kardosu 13 iyul kuni "Expresso"ga bergan intervyusida mazkur voqea yuzasidan surishtiruv ishlari olib borilayotganini tasdiqlagan. Polisiya suv motosikli kimga tegishli ekanini aniqlashga harakat qilyapti.

Ushbu holat uchun Ronaldu jarima to‘lashiga to‘g‘ri kelishi mumkin. Chunki gidrosiklni boshqarish uchun tegishli lisenziya kerak. Lisenziya esa balog‘atga yetgan shaxsga beriladi.

Portugaliya qonunchiligiga ko‘ra, tegishli lisenziyasiz gidrosiklni boshqarganlik uchun jarima miqdorida 3000 yevrogacha yetishi mumkin.