“Atletiko”ga qarshi o‘ynash futbol dunyosidagi eng murakkab vazifalardan biri. Bu haqiqatdan ham juda yaxshi tashkillashtirilgan jamoa. Go‘yo natija-mashina. Agar olamda, barcha tomonlama mukammal bo‘libgina mag‘lub etish mumkin bo‘lgan bir klub bo‘lsa, bu – “Atletiko”. Ular hech kimga sovg‘a berishmaydi. Eng yaxshi o‘yinni ko‘rsatmadingmi – tamom. Senda ularga qarshi imkon yo‘q.

Ha, Yurgen Kloppning yuqoridagi so‘zlari chin. Germaniyalik mutaxassis buni o‘z tanisida his qilib ulgurdi. Simeoni jamoasi turnirning amaldagi chempionini 1/8 finalda dog‘da qoldirdi. Oldindagi o‘yinga “Atletiko” 18 uchrashuvli mag‘lubiyatsiz seriya bilan yetib kelyapti. Yaxshi eslayman, mavsum avvalidagi studiya ko‘rsatuvlarimizda klubning omadsizliklari vaqtincha ekani, baribir yakunda u o‘ziniki bo‘lgan o‘rinni qaytarib olishi haqida ayganmiz. Adashmadik. Madridliklar ikkinchi davrani, xossatan restardan keyingi davrni a’lo darajada o‘tkazib, Laligada 3-o‘rinni egalladi. So‘zsiz yaqin soatlar ichida boshlanadigan o‘yinda “Atletiko” favorit.

2009 yilda tashkil topgan “RB Leypsig” qanday tizimda rivojlanayotgani haqida ko‘p maqolalar yozildi, fikrlar aytildi. Zamonaviy futbolga rang beruvchi tizim sifatida taassurot qoldirmoqda “redbullchilar”. O‘yin borasida “Atletiko”ning ziddi. Hujumkor bir jamoa. Yakunlangan mavsumda klub 34 o‘yinda 81 bor raqiblar darvozasini ishg‘ol qildi. Bu avvalgi mavsumlar bilan solishtirganda ancha ijobiy (66, 57, 63). O‘tkazib yuborilgan gollar borasida ham holat yaxshilanmoqda. Bir so‘z bilan aytganda 2016 yil Bundesligada debyut qilgan “Leypsig” xatolarni kamaytirib, mukammalashib bormoqda. Bu yerdagi o‘yin va natijalarni Ralf Rangnik bilan bog‘lashadi. Rost. Yosh klubni elitaga olib chiqqan mutaxassis e’tiroflarga loyiq. Boshqa tomondan, u ketgach tasvirga zarar yetmadi. Jamoani qabul qilib olgan juda yosh murabbiy - Yulian Nagelsman (33 yosh) qurilayotgan bino arxitekturasini buzib yubormay, o‘z ishlanmalarini qo‘sha olayotgan muhandis, go‘yo.

Xo‘sh, bu ikki xil falsafa to‘qnashuvida kim g‘olib bo‘ladi?! Simeone-Nagelsman kurashini maydonda ko‘ramizmi?! Qaysi biri samaraliroq – tartib yoki go‘zallik?!

Javoblarni birga olamiz. Futbol TV va UzReport TV telekanallarida. Soat 23:55dan boshlab kuzating!

Orif Tolipov.