Koronavirus pandemiyasi paytida Xalqaro futbol assosiasiyalari federasiyasi (FIFA) kengashi futbolchilarning terma jamoaga qo‘yib yuborilishi yuzasidan vaqtinchalik qoida joriy qildi. Bu haqda tashkilot rasmiy sayti xabar tarqatdi.

Pandemiya bilan bog‘liq vaziyat butun dunyo bo‘ylab shiddat bilan rivojlanmoqda. Ko‘p mamlakatlar hukumati chegara bilan bog‘liq cheklovlar joriy qildi. Bunday choralar, masalan, majburiy karantin muddati va boshqa cheklovlar bevosita xalqaro uchrashuvlarga ta’sir ko‘rsatadi.

Yangi qoidalarga ko‘ra, klublar quyidagi shartlar mavjud bo‘lganida o‘z o‘yinchilarini terma jamoa ixtiyoriga qo‘yib yubormasligi mumkin:

— futbolchi tashrif buyuradigan mamlakatda kamida 5 kunlik majburiy karantin joriy qilingan bo‘lsa;

— agar mamlakatga kirish yoki undan chiqishga cheklov o‘rnatilgan bo‘lsa;

— qabul qiluvchi mamlakat o‘yinchilar yoki jamoalarga maxsus qoidalar taqdim etmagan bo‘lsa.

Bundan tashqari, xalqaro uchrashuvlar uchun ajratilgan tanaffus paytida barcha ishtirokchilar sog‘liqni saqlash va xavfsizlik qoidalariga amalga qilishlari kerak.

Bu qoidalar erkaklar jamoalari uchun 31 avgustdan 8 sentyabrgacha, ayollar jamoalari uchun esa 14 - 22 sentyabr kunlari uchun amal qiladi.