Kecha — 26 avgust kuni soat 13:53 da “Andijon” futbol klubi o‘zining U-21 jamoasi “Paxtakor”ga qarshi uchrashuvga moliyaviy qiyinchiliklar sabab yetib kela olmasligini ma’lum qildi. O‘zPFL mazkur xatga asosan o‘rinbosarlar uchrashuvini bekor qilib, “Andijon” U-21 jamoasiga texnik mag‘lubiyat yozdi. 

Bugun — 27 avgust kuni soat 10:47 da “Andijon” futbol klubi o‘zining asosiy tarkibi ham “Paxtakor” bilan uchrashuvga yuqoridagi sabab tufayli kela olmasligini ma’lum qildi. Rasmda keltirilgan xat asosida O‘zPFL uchrashuvni bekor qildi. Bu xabar “Paxtakor” futbol klubiga, uchrashuv xavfsizligi uchun javobgar bo‘lgan Ichki ishlar organlariga, “Lokomotiv” stadioni ma’muriyatiga, uchrashuv translyasiyasi uchun javobgar bo‘lgan “Sport” telekanaliga ma’lumot uchun taqdim etildi. 

“Andijon” klubining birinchi xatidan 1 soat-u 20 daqiqa o‘tib, klub uchrashuvda ishtirok etmoqchi ekani borasida xat yo‘lladi. Har ikki xat vise-prezident Ma’ruf Abdusalomov tomonidan imzolangan.

O‘zPFL har qanday holatda ham futbol uchrashuvlarini o‘tkazish uchun harakat qiladi. Shundan kelib chiqib, bekor qilingan barcha tadbirlar qayta tiklanadi va umid qilinadiki, “Andijon” klubining bu kabi mas’uliyatsizligi qayta takrorlanmaydi. O‘zPFL Ma’ruf Abdusalomovdan o‘z ishiga mas’uliyat bilan yondoshishni, shuningdek, klub ustavida qayd etilmagan vise-prezident lavozimi bilan emas, aynan ustavda mavjud lavozim bilan xatlarga imzo chekishni so‘raydi.