Mavsumlar oralig‘ida “Chelsi” transferlari bilan portlovchi effekt hosil qila oldi. Bir yil avval yetakchi Eden Azarni Madridga kuzatib qo‘ygan londonliklar uning evaziga bir mavsum o‘tib butun maydon bo‘ylab juda iqtidorli futbolchilarni safga qo‘shib oldi – Timo Verner, Kay Xavers, Tyago Silva, Malang Sarr, Hakim Ziyesh va Ben Chillvel. Bu maqsadda 200 mln. funt sterling sarf etgan Abramovich to‘xtamoqchi emas. Hozir Lempard “Renn” klubi bilan darvozabon Eduar Mendi transferi bo‘yicha muzokaralar olib bormoqda. Dahshat shunday emasmi?
Aslida Messining “ketishi” bo‘lmaganida “Chelsi”ning bu yurishlari yanada ko‘proq muhokama qilingan bo‘lardi. Ammo, GOAT* va “Barselona” atrofidagi voqealar bunga biroz to‘sqinlik qildi.
Ilk raqib start uchun qulay bo‘lishi mumkin. O‘rtamiyodan past natijalar ko‘rsatayotgan (o‘tgan mavsum 15-o‘rin) “Brayton” maydoniga safar uyushtirib “Chelsi” yangi tarkibi bilan qanday o‘yin ko‘rsatishi ko‘pchilikni qiziqtirmoqda. Mashhur filmda aytilganidek “Agar echki halaqit qilmasa” barchasi yaxshi bo‘lishi lozim.
*(Greatest of All Time – barcha zamonlarning eng buyugi ma’nosini beradi. Shuningdek, alohida so‘z sifatida “Goat” – “echki” deb tarjima qilanadi)
