«Jenoa» matbuot xizmati bosh murabbiy Rolando Maranning Italiya Kubogi doirasida «Sampdoriya» ustidan qozonilgan g‘alabadan keyingi fikrlarini ma’lum qildi.

— G‘alaba juda yoqimli bo‘ldi, chunki og‘ir damlarni boshimizdan o‘tkazyapmiz. Yakshanba kungi o‘yindan keyin aytganimdek, biz ikkinchi davra uchun ilk tamal toshini qo‘yishni boshladik. Kelasi yili, ya’ni, mavsumning ikkinchi yarmida biz shunday o‘yin ko‘rsatishimiz kerak. Futbolchilarning miyasini tozalab, ularning harakatlariga agressivlik qo‘sha oldik. Yigitlarning ruhiy jihati borasida ko‘proq ishlash kerak, chunki ular maydonga tushganida shunday o‘yin ko‘rsatishi lozimki, barcha hayron qolsin. Bu borada ko‘p ishlar qildik. Og‘ir damlarni o‘tkazayotgan jamoa futbolchilariga oson emas, shunday bo‘lsa ham yigitlarim birinchi bo‘limni yomon o‘tkazmadi. Ammo ikkinchi bo‘limdagi o‘yinni inobatga oladigan bo‘lsak, derbida muhim g‘alabaga erishdik, deb hisoblayman.

«Jenoa» futbolchilari ikkinchi bo‘limda juda ajoyib harakat qilishdi

— Tanaffusda futbolchilarga motivasiya berish qiyin bo‘lmadimi?

— Qiyin bo‘lyapti. Ketma-ket mag‘lubiyatlar ularni siqiltirib qo‘ygan. Futbolchilar qiynalayotgan jihatlar bo‘yicha yordam berishga, maslahatlashishga doim harakat qilib kelganman. Biroq baribir barchasi futbolchilarning ijodkorligiga, mahoratiga ham bog‘liq. Yigitlarni tabriklayman. Bu ular uchun har tomonlama ajoyib g‘alaba bo‘ldi.

Eldor Shomurodov va Janlukki Skamakka ajoyib duet bo‘lishdi

— Tarkibda asosan Skamakka ko‘proq gol uryapti. Jamoadagi hujumchilar muammosini bartaraf eta oldingizmi?

— Bugun ancha vaqt o‘ynamagan Eldorni ham tarkibga qaytardik. U o‘yinga temp bag‘ishlay oldi. Bundan xursandman. U asta-sekinlik bilan o‘sib boryapti. Biz Eldorni ikkinchi davraga yaxshilab tayyorlashimiz kerak. Chunki ikkinchi davradan bizda umuman boshqa rejalar asosida o‘yinni tashkillashtiramiz. O‘ylaymanki, futbolchilar bu borada muxlislarga o‘ziga xos signal bera olishdi.