Ertaga AGMK O‘zbekiston kubogi doirasida Toshkentning "Lokomotiv" jamoasiga qarshi nimchorak final o‘yinini o‘tkazadi.

O‘yin qur’a natijasiga ko‘ra mehmonda o‘tadi. E’tiborga molik tarafi, bu ikki jamoalar O‘zbekiston kubogi doirasida ilk marotaba to‘qnash kelishmoqda. Bunga qadar AGMK va "Lokomotiv" milliy chempionat va O‘zbekiston superkubogida bahs yuritgan.

O‘zaro o‘yinlar statistikasiga ko‘ra, o‘tkazilgan 26 o‘yinda "Lokomotiv" 17 g‘alabani tantana qilgan, AGMK esa 5 marotaba "temiryo‘lchilar"dan ustun kelgan. Qolgan 4 bellashuvda g‘olib nomi aniqlanmagan. To‘plar nisbati: 52-30, "Lokomotiv" foydasiga.

Joriy mavsum jamoamiz "Lokomotiv" bilan ikki marotaba to‘qnash kelib, markazlashtirilgan holatda o‘tkazilgan birinchi davra bahsida 3:1 hisobida g‘alaba qozongan bo‘lsa, "Lokomotiv" uyidagi bellashuvda mezbonlar 2:1 hisobida yutdi.

AGMK 2004 yildan e’tiboran mamlakat kubogi musobaqasida ishtirok etib kelmoqda. Jamoamiz O‘zbekiston kubogidagi o‘tkazilgan jami 44 o‘yinda 17 g‘alaba, 9 durang va 18 mag‘lubiyat qayd etgan. AGMK jamoasining O‘zbekiston kubogidagi to‘plar nisbati quyidagi ko‘rinishda: 62-63.

"Lokomotiv"ga qarshi o‘yin haqidagi yana bir qiziq jihat, joriy mavsumdagi uchta o‘yin AGMK jamoasi uchun begona maydonda o‘tmoqda. Chempionat doirasidagi birinchi davra o‘yini neytral maydonda o‘tgandi, ikkinchi davrada esa "Lokomotiv" o‘yingohida mehmon bo‘lgan AGMK kubok bahsida ham ertaga ushbu stadionga boradi.

Uchrashuv 8 dekabr kuni soat 14:00da boshlanadi. G‘olib jamoa O‘zbekiston kubogidagi yurishini davom ettirib, chorak finalga yo‘llanma oladi.

Bo‘lajak o‘yinga Mirjalol Qosimov boshchiligidagi jamoamiz jiddiy hozirlik ko‘rmoqda va ertangi bahsda AGMK o‘z muxlislarini xursand qilish maqsadida maydonga tushadi.

O‘zbekiston kubogi, 1/8 final.
8 dekabr, seshanba
"Lokomotiv" — AGMK (14:00)
Hakamlar: Akobirxo‘ja Shukurullayev, Sardor Nishonboyev, Avaz Abdullayev, Ahmadjon Ergashev
Nazoratchi: Marat Ismoilov
Komissar: Laziz Qo‘chqorov