«Nasaf» futbol klubi o‘tgan mavsumda bosh jamoamiz safida debyut mavsumini o‘tkazgan va muxlislar e’tiborini qozongan Husayn Norchayev, Abubakrrizo Turdialiyev hamda Murodbek Xo‘jamberdiyevlar bilan o‘rtadagi shartnoma muddatlari 2023 yil oxirigacha uzaytirildi.
O‘zingizga ma’lum, o‘tgan mavsumda Husayn Norchayev uchala jamoamiz tarkibida harakat qilib, har uchala jamoa bilan ham sovrin yutgan futbolchiga aylangandi. Norchayev debyut mavsumdayoq Superligada uchta gol urishga erishgan. Abubakrrizo Turdialiyev ham Superligada ikkita golga hammualliflik qildi. Jamoamizning yana bir umidli futbolchisi Murodbek Xo‘jamberdiyevni Superligadagi o‘yinlari bilan muxlislar ko‘nglidan joy oldi deb bemalol aytish mumkin.
«Nasaf» futbol klubi rahbariyati hozirgi kunda bir qator yetakchi futbolchilarimiz Marko Stanoyevich, Bobir Abdixoliqov hamda Sharof Muhitdinovlar bilan ham muzokara olib bormoqda. Muzokaralar yakunlanganidan so‘ng siz aziz muxlislarga bu haqida ma’lumot beramiz.
