«Насаф» футбол клуби ўтган мавсумда бош жамоамиз сафида дебют мавсумини ўтказган ва мухлислар эътиборини қозонган Ҳусайн Норчаев, Абубакрризо Турдиалиев ҳамда Муродбек Хўжамбердиевлар билан ўртадаги шартнома муддатлари 2023 йил охиригача узайтирилди.
Ўзингизга маълум, ўтган мавсумда Ҳусайн Норчаев учала жамоамиз таркибида ҳаракат қилиб, ҳар учала жамоа билан ҳам соврин ютган футболчига айланганди. Норчаев дебют мавсумдаёқ Суперлигада учта гол уришга эришган. Абубакрризо Турдиалиев ҳам Суперлигада иккита голга ҳаммуаллифлик қилди. Жамоамизнинг яна бир умидли футболчиси Муродбек Хўжамбердиевни Суперлигадаги ўйинлари билан мухлислар кўнглидан жой олди деб бемалол айтиш мумкин.
«Насаф» футбол клуби раҳбарияти ҳозирги кунда бир қатор етакчи футболчиларимиз Марко Станоевич, Бобир Абдихолиқов ҳамда Шароф Муҳитдиновлар билан ҳам музокара олиб бормоқда. Музокаралар якунланганидан сўнг сиз азиз мухлисларга бу ҳақида маълумот берамиз.
