Yurgen Klopp uchun 2020-yilga qaraganda, 2021-yil qiyinroq boshlanganini ko‘pchilik muxlislar sezgan bo‘lsa kerak. Dekabr oyining oxirlarda "Liverpul" jamoasi uchun omadsiz kunlar boshlandi, shundan so‘ng "qizillar" ochko yo‘qotishni boshladi va bu muvaffaqiyatsizliklar hozirgacha davom etib kelmoqda. Tasodifga o‘xshab ko‘rinadigan "Nyukasl" va "Vest Bromvich" jamoalari bilan qayd etilgan durang hamda "Sautgempton", "Byornli", "Brayton" kabi jamoalardan uchralgan mag‘lubiyatlar jamoani kundan-kunga turnir jadvalida pastga sho‘ng‘ishiga olib kelmoqda.

O‘tgan hafta "Enfild"da qayd etilgan natija hammasidan ham oshib tushdi. "Liverpul" o‘z maydonida Gvardiolaning "Siti"sidan 1:4 hisobidagi mag‘lubiyatni qabul qilib oldi. Alissonning qo‘pol xatolari hamda jarohatlangan o‘yinchilarning maydonga haligacha qaytmaganligi, APL jadvalida 4-o‘ringa tushib ketishi va 1-o‘rindagi "Manchester siti" jamoasida 10 ochko ortda qolishiga olib keldi. Klopp jamoasi mazkur mag‘lubiyatdan keyin, ketma-ket uy uchrashuvlarida ochko yo‘qotib, antirekord qayd etishdi.

Boz ustiga, 9-fevral kuni Yurgen Klopp hayotida juda og‘ir kun bo‘ldi. Uning onasi Elizabeta Klopp 81 yoshida vafot etdi. Yaqin qarindoshidan ajralish, ustiga-ustak pandemiya sabab dafn marosimiga ham bora olmaslik vaziyatni yanada chigallashtirdi. Vaziyat shundan iboratki, Germaniyada qat’iy cheklovlar mavjudligi sabab, Buyuk Britaniyadan koronavirusning yangicha turi topilganligi uchun bu davlatlar o‘rtasida aviaqatnovlar vaqtincha to‘xtatilgan. Bunday cheklovlar Yevropaning boshqa qismlarida ham joriy etilgan, shu sabab YECHLning ba’zi uchrashuvlari Italiya, Vengriya va Polshaga o‘tkazilishi ko‘zda tutilgan.

Yurgen otasidan 2000-yilda ayrilgan. O‘shanda murabbiy "Mayns" jamoasi futbolchisi sifatida to‘p tepardi. Norbet Klopp og‘ir xastalikdan so‘ng 66 yoshida vafot etgan. Klopp onasini so‘ngi marta tug‘ilgan kunida, 80 yoshga to‘lganida ko‘rgan. Ishi va pandemiya sabab bu ularning oxirgi uchrashuvi bo‘lib qoldi. Germaniyalik mutaxassis onasi vafot etgandan so‘ng, quyidagi fikrlarni aytib o‘tdi: "Bu men uchun ko‘p narsani anglatadi. Men dunyodagi eng yaqin insonimdan ajraldim. Ushbu holatga ko‘nikishim juda qiyin kechmoqda. Men dindorman va onamni haqiqiy dunyoga ketganini bilaman. Pandemiya sabab dafn marosimida qatnasha olmadim, imkon paydo bo‘lishi bilan vatanimga uchib boraman va xotirasi uchun hamma narsani qilaman".

Jamoa a’zolari ham chetda qarab turmadi va murabbiyini qo‘llab-quvvatlash uchun qo‘llaridan kelgan barcha ishni qildi. Ijtimoiy tarmoqlar orqali, "qizillar"ning mashhur shiori, klub madhiyasining nomi - "You’ll Never Walk Alone " nomli hesh-teglar qoldirishdi. Qo‘shiq azaldan har qanday vaziyatda qo‘llab-quvvatlashning ramzi bo‘lib kelgan. U o‘tgan asrning o‘rtalarida juda mashhur bo‘lgan. Uning eng taniqli ijrochisi Jerri Marsden ushbu qo‘shiq haqida quyidagi fikrlarni bildirgan: "Bu qo‘shiqni ijro etganimdan so‘ng, menga dunyoning turli hududlaridan minnatdorchilik xatlari kelgan. Qo‘shiq to‘ylarda, dafn marosimlarida ham yangragan".

Kloppni muxlislar va ko‘pgina klublar ham qo‘llab-quvvatlashdi, ular orasida "Liverpul"ning asosiy raqibi bo‘lgan "Manchester Yunayted" ham bor edi: "MYU" o‘z tvitter sahifasida "Yurgen, sen va oila a’zolaringga chuqur hamdardlik bildiramiz", deb yozib qoldirdi.

Biz ham Yurgen Kloppga hamdardlik bildirgan holda, uning hayotidagi qora dog‘lar ketib, o‘rnini faqat xursandchilik egallashini tilab qolamiz.

Jamshidjon Mahmudov tayyorladi.