Coca Cola Superliga 2-turidan o‘rin olgan “Lokomotiv” – “Navbahor” (1:2) jamoalari o‘rtasidagi uchrashuvdan keyingi matbuot anjumanining ikkinchi qismida “Lokomotiv” bosh murabbiyi Mikael Sekeyra ishtirok etib, jurnalistlarning savollariga javob berdi. Mezbonlar ustozi o‘z so‘zini  o‘yin haqidagi fikrlari bilan boshlab, jumladan, shunday dedi:  

— O‘yin oson o‘tmadi. VAR bilan bog‘liq to‘xtalishlar hisobiga o‘yinimiz yaxshi chiqmadi. Jamoamizdagi futbolchilar ham qo‘llaridan kelganicha harakat qilishdi. Maqsadimiz g‘alaba qozonish edi. Nima ham derdim, “Navbahor”ni g‘alaba bilan tabriklayman.

Shundan so‘ng, Mikael Sekeyra OAV xodimlarining savollariga javob berdi.   

— “Lokomotiv” ikkita turdan buyon yaxshi o‘ynab, mag‘lubiyatga uchramoqda. Jamoada ichki muhit qanday? Navbatdagi o‘yinlarda g‘alabaga umid qilsa bo‘ladimi?
— Ikkita o‘yinda ham shogirdlarim yomon o‘yin ko‘rsatishmadi. Ayrim vaziyatlardagi to‘p yo‘qotishlar mag‘lubiyatga uchrashimizga sabab bo‘ldi. Keyingi uchrashuvlarda g‘alaba qozonishga harakat qilamiz. Yigitlar berilgan vazifani bajarishdi. To‘g‘ri, mag‘lub bo‘ldik, bunga men javobgarman. Oldinga intilishda davom etamiz.

— Yuqorida o‘yinchilarda ayb yo‘qligi, barcha ko‘rsatmalaringizni to‘liq bajarishgani haqida aytdingiz. “Navbahor”ning g‘alaba golini zaxiradan maydonga tushgan o‘yinchilar yuzaga keltirishganini hisobga olsak, bugun Viktor Jalilovga taktik tomonlama yutqazganingizni tan olasizmi?
— Bu yerda o‘yinlar, jarayon boshqacha ekanligiga guvoh bo‘ldim. Buni ikki oy ichida o‘zgartirib bo‘lmaydi.

“Navbahor” PFK matbuot xizmati.