"Mavsumni muvaffaqiyatli boshlagan "Sherlar" Superliga 4-turida "Metallurg" bilan o‘yinda buni davom ettirishga urinib ko‘rishadi.

Chempionatlar doirasida klublar 48 bor to‘qnash kelishgan. "Sherlar" 40 bellashuvda zafar quchishgan, 4 o‘yinda "Metallurg" g‘olib chiqqan. 4 uchrashuvda jamoalar durang o‘ynashgan. “Paxtakor” 128 gol urib, o‘z darvozasidan 36 to‘p olib chiqqan.

"Metallurg"ni ayni paytda Jasur Abduraimov boshqarmoqda. Ushbu mutaxassis oxirgi bir necha yilda jamoamiz murabbiylar shtabida faoliyat yuritgandi.

Toshkentdagi o‘yinlarning 22tasida “Sherlar” ustun kelishgan. 2 uchrashuvda durang kuzatilgan. Jamoamiz uydagi bahslarda "Metallurg"ga umuman mag‘lub bo‘lmagan. Oxirgi 10 o‘yinning barchasida "Paxtakor" ushbu raqibdan ustun kelgan.

So‘nggi marta Bekobod jamoasi 2016 yilgi mavsumda o‘z maydonida 2:0 hisobida g‘alabaga erishgan. O‘zaro bahslarda eng yirik g‘alaba - 6:0 natijasi "Paxtakor"ga tegishli.

2003 va 2006 yillarda "Sherlar" raqibni shunday natijalar bilan dog‘da qoldirishgan. Yirik g‘alabalarimiz soni jami 16tani tashkil qiladi. Bellashuvni diskvalifikasiya tufayli o‘tkazib yuboradigan futbolchilar yo‘q.

"Paxtakor" va "Metallurg" o‘rtasidagi uchrashuv 2 aprel, juma kuni "Paxtakor" stadionida soat 18:30da boshlanadi. Muxlislarni chiroyli futboldan bahramand bo‘lishga chaqirib qolamiz."