Londonning «Tottenxem» jamoasi Angliya Premer ligasi 32 turi doirasida «Everton» maydoniga safar uyushtirib, 2:2 hisobidagi durang natijani qayd etgandi. Ushbu bahsning oxirgi daqiqalarida «shporlar»ning sardori va yetakchisi Harri Keyn jarohat olib, maydonni erta tark etgandi. Bugun chiqqan ma’lumotlarga ko‘ra, londonliklar futbolchisi bir necha haftaga safdan chiqqan. Keyn «Sautgemton»ga qarshi 29 tur doirasidagi qoldirilgan uchrashuvda maydonga tusha olmaydi. Qolaversa, 25 aprel kuni bo‘lishi kutilayotgan «Manchester Siti»ga qarshi Angliya Liga kubogi finalida maydonga tushishi ham so‘roq ostida qolmoqda.
