Birozdan keyin Ispaniya chempionati 34-turining markaziy bahsi boshlanadi. Mazkur o‘yin (19:15 da boshlanadi, Toshkent vaqti bilan) oldidan taniqli sharhlovchi Davron Fayziyev o‘z fikrlari bilan bo‘lishdi.
O‘sha kun keldi.
Uchta grand Atletiko, Real va Barselona Ispaniyada chempionlik uchun kurashayotganidan xabaringiz bor. Hammasini Barselona - Atletiko o‘yini hal qiladi, degan gapga ham ko‘p duch kelayotgandirsiz. O‘sha o‘yin bugundir! Haqiqatdan ham uch yetakchidan ikkitasi o‘zaro o‘ynashi vaziyatni ancha oydinlashtiradi. Agar Atletiko yutsa Barsa tituldan quruq qoladi. Aksincha, Barselona g‘alaba qozonsa intriga yanada kuchayadi va Atletiko uyog‘iga xato kutib yashaydi. Qanchalik g‘alati eshitilmasin, ammo Real Madrid uchun Barselonaning g‘alabasi qulayroq. Yoki durang. Ha, murakkab. La Liga muxlisi bo‘lmasangiz balki tushunishingiz ham shart emasdir. Shunchaki bilingki, bugun Ispaniya chempionatining eng kulminasion uchrashuvi bo‘lib o‘tadi. Haqiqiy jang! Birgalikda tomosha qilamiz.
Iftorlik stoli atrofida televizor pulti uchun kurashda sizga omad tilayman, arziydigan o‘yin.
