The New York Times nashrining yozishicha, ikkita o‘yindan iborat bo‘lgan yarim final o‘yinlarini bittaga tushirish varianti ko‘rib chiqilmoqda. Bundan tashqari, yarim finalning har ikkala juftligi o‘yini va final bahsi ham bir shaharda bir hafta ichida o‘tkazilishi mumkin.

Shuningdek, uchrashuvlarning o‘zi turli ko‘ngilochar tadbirlar bilan to‘ldiriladi. Bularga afsonaviy futbolchilar ishtirokidagi o‘yinlar va konsertlar kiradi.

UYEFA menejerlari yarim finaldagi o‘yinlar sonini qisqartirish katta auditoriya tufayli moliyaviy yo‘qotishlarga olib kelmaydi degan fikrda. Ta’kidlanishicha, bunday o‘zgarishlarni amalga oshirish g‘oyasi 2019/20 yilgi mavsumda koronavirus pandemiyasi avjida bo‘lgan vaqtdagi format muvaffaqiyatlariga asoslangan. O‘shanda chorak finali bosqichidan boshlab jamoalar bittadan o‘yin o‘tkazgandi va barcha uchrashuvlar Lissabonda bo‘lib o‘tgandi.

Shuningdek, kamida 2024 yilgacha, Chempionlar Ligasi islohoti rejalashtirilgan paytgacha hech qanday o‘zgarishlar kuchga kirmasligi qo‘shimcha qilingan.