Himoyachi David Alaba "Bavariya"dan "Real"ga o‘tgani haqida fikr bildirdi.

"Real" mening ro‘yxatimda birinchi edi. Ushbu klub, xuddi Bavariya kabi, dunyodagi eng yirik klublardan biri hisoblanadi. Uning buyuk tarixi bor. Bu yerda biz faqat har bir uchrashuvda g‘alaba qozonish, barcha yutish mumkin bo‘lgan sovrinlar haqida gaplashamiz.

"Bavariya"da menga g‘oliblik mentaliteti, titullarga chanqoqlik singib ketdi. Bu "Real"da qo‘l keladi. Men ushbu jamoaning yutuqlariga o‘z hissamni qo‘shishni, ushbu klub tarixiga kirishni istayman. "Bavariya"da 13 yil ishlaganimdan so‘ng, Yevropa chempionati tugagach, "Real"da yangi yo‘lni boshlash ishtiyoqiga to‘lganman", - deya Alabaning so‘zlarini keltirgan Bild nashri.

Avvalroq, "Real" himoyachi bilan besh yillik shartnoma imzolagani ma’lum bo‘lgan edi. Futbolchi Yevro-2020 yakunlangandan so‘ng "Real"ning yangi futbolchisi sifatida tanishtiriladi.

David Alaba "Bavariya"da 2009-yildan beri o‘ynab kelayotgandi. Avstriyalik futbolchi Bundesligada o‘yinlar soni bo‘yicha chet elliklar orasida Myunxen klubining rekordchisiga aylangandi.