Coca Cola Superliga 11-turidan o‘rin olgan “Metallurg” – “Navbahor” (2:2) uchrashuvidan keyin o‘tkazilgan matbuot anjumanining ikkinchi qismida mezbonlar bosh murabbiyi Jasur Abduraimov qatnashdi.

— 2:0 hisobida oldinda borayotgandik, xatolarga yo‘l qo‘yishimiz sababli hisob tenglashdi. Futbolchilarimiz harakat qilishyapti, oldinga intilishyapti, murabbiy uchun asosiysi shu. Birinchi navbatda o‘yinni shakllantirishga e’tibor qaratyapman. Jamoamiz ketma-ket top jamoalarga qarshi o‘yin o‘tkazdi. Dastlab AGMK, keyin “Nasaf”, mana endi “Navbahor”. Har bir bahsda biz o‘yin tomonlama yutqazmadik. Xatolar hammada ham bo‘ladi, lekin xarakter ham bo‘lishi kerak. Yigitlarga harakat qilishayotgani uchun rahmat aytaman. “Navbahor” tarkibidagi futbolchilar ham yaxshi saviyada, ular ham mehnat qilishmoqda. Bugun 2:2 o‘ynadikmi, demak shunday bo‘lishi kerak ekan.

— “Navbahor” jamoasini qanchalik o‘rganib chiqqandingiz? Jamoangiz 2:0 hisobida oldinda borayotib, keyin ikkita gol o‘tkazib yubordi...
— Bugun taktik tomonlama raqibga yutqazmadik. Ammo kimdir oxirigacha kurashmadi, oqibatda, gol o‘tkazib yubordik.

— Doniyor Narzullayev so‘nggi o‘yinlarda maydonga tushmayapti...
— Futbolchida xarakter bo‘lishi, mashg‘ulotlarda o‘zini ko‘rsatishi kerak. Shundagina asosiy tarkibga kirishi mumkin. Hozircha Doniyorda bu narsani ko‘rmayapman, shunday bo‘lishini sezishim hamono, u o‘sha zahoti maydonga tushadi. Boshlang‘ich tarkibga kiradami, zaxiradan tushadimi, asosiysi, o‘ynaydi.

— Keyingi turda “Metallurg” “Turon” maydoniga safar qiladi. Ushbu raqib haqidagi fikringiz qanday?
— “Turon”da murabbiy almashdi, jamoa harakat qiladi. Men “Metallurg” uchun javob beraman. Meni xursand qilayotgani, futbolchilar astoydil harakat qilishmoqda. Hujumkor, zamonaviy futbol namoyish etishmoqda. To‘g‘ri, xatolar bor, ammo sifat ham ko‘rinmoqda. “Navbahor”ga hamma jamoa ham 2 ta gol urolmaydi.

“Navbahor” PFK matbuot xizmati.