Futbol TV sharhlovchisi Bobur Akmalov Angliya va Germaniya o‘rtasidagi Yevro-2020 nimchorak final uchrashuviga anons qilish bilan birgalikda o‘yinni kim bilan sharhlab borishini ma’lum qildi.
Kechagi o‘yin kuni Yevro-2020ning bezagi bo‘ldi, deyishyapti va men bunga qo‘shilaman. Ikki o‘yinda 14 gol, ekstra-taymlar, penaltilar seriyasi va olam-olam emosiyalar.
Niderlandlar, portugallar va fransuzlar tark etgan turnir qanaqa bo‘larkin endi? Yaxshi bo‘ladi, menimcha. Belgiya bor, Italiya bor, qolaversa, biz kutmaganda yorqin o‘ynab tashlagan jamoalar bor va...
Va Angliya yoki Germaniya bor chorakfinalda. Bugungi nimchorakfinal o‘yinidan so‘ng bitta grand albatta bo‘ladi turnirda. Yoki bir grand aniq bo‘lmaydi. Bunisi endi stakanning yarmi bo‘shmi yo yarmi to‘lami, degan gapga o‘xshaydi - qay tomondan qarashga bog‘liq. Men pozitiv tomonidan qarayman va inglizlar ham, nemislar ham o‘sha bo‘sh stakanning yarmini to‘ldira oladigan jamoa ekaniga aminman.
Bugungi Angliya - Germaniya o‘yinida Davron Fayziyev bilan birga ishlaymiz. Bu tandem ham ilk marta, darvoqe.
Bobur Akmalov
