Italiyaning «Parma» klubi darvozaboni va jahon chempioni Janluidji Buffon o‘z vatandoshi Janluidji Donnarummaning bir kun kelib «Oltin to‘p»ni yutishiga ishonmoqda.

Eslatib o‘tamiz, avvalroq bu sovrin faqat birgina darvozabon, ya’ni afsonaviy Lev Yashinga taqdim etilgan edi.

«Mening fikrimcha, u «Oltin to‘p»ni albatta olishi kerak. O‘z fazilatlari va ko‘rsatgan o‘yinlari uchun ham Janluidji «Oltin to‘p»ga haqli.

Yoshligingizdan sizning maqsadingiz har doim maksimal darajaga intilish bo‘lishi kerak. Jiji katta mehnat qilmoqda va u to‘g‘ri yo‘lda", - deydi Buffon.

Avvalroq Donnarumma Italiya terma jamoasiga Yevropa chempionligini yutishda katta yordam bergan edi. U yakunda musobaqaning eng yaxshi o‘yinchisi deb topildi.