Futzal bo‘yicha O‘zbekiston milliy jamoasi bosh murabbiyi Bahodir Ahmedov jahon chempionati guruh bosqichidan 3-turi doirasida bo‘lib o‘tgan Misrga qarshi o‘yin (2:1)dan so‘ng o‘z fikrlari bilan o‘rtoqlashdi.

"Bugun xalqimizga chiroyli g‘alaba taqdim etishni istagandik. Bu faqat bizning g‘alabamiz emas, xalqimizning ham g‘alabasi deb o‘ylayman. Muxlislarimizga bayram ulashganimizdan xursandmiz.

Bu men uchun murabbiylik faoliyatimdagi jahon chempionatida qo‘lga kiritgan ilk g‘alabam hisoblanadi. Bu men uchun katta sharaf. Yigitlarimiz avvalgi 2ta bahsda chiroyli o‘ynaganiga qaramay, g‘alaba qozona olishmagandi. Bugun esa u qadar chiroyli o‘yin ko‘rsata olmagan bo‘lsak-da, nimalarga qodirligimizni namoyish etdik va g‘alaba qozondik. Muhimi — natija.

Nimaning evaziga Misrni mag‘lub etdik? Bugun to‘pni yaxshi nazorat qildik, himoyada yaxshi harakat qildik. Faqat bir marta himoyada yo‘l qo‘yilgan xato tufayli gol o‘tkazib yubordik. O‘zimizning kuchli jihatlarimiz bizga bugun qo‘l keldi", — dedi Bahodir Ahmedov.