Bugun o‘zbek futbolining eng yorqin yulduzlaridan biri, uzoq yillar davomida milliy terma jamoamizda betakror o‘yinlar o‘tkazgan Odil Ahmedov futbolchilik faoliyati yakunlanganini e’lon qildi. Keling, Ahmedovning milliy jamoamizdagi faoliyatini yodga olamiz:
2007 yilda Odil milliy terma jamoa safida debyut qilgan. O‘shandan beri 108 ta o‘yin o‘tkazdi va 21 ta gol urishga muvaffaq bo‘ldi. 4 ta Jahon chempionati saralashida qatnashdi, 3 bor Osiyo kubogida ishtirok etdi va «O‘zbekiston Respublikasida xizmat ko‘rsatgan sportchi» faxriy unvoni bilan taqdirlandi.
Odil Ahmedov nafaqat O‘zbekistonning, balki o‘z vaqtida Osiyoning eng yorqin futbolchilaridan biriga aylandi. Ahmedov deganda ishonch, fidoyilik, jonkuyarlik timsollari ko‘z oldimizga keladi.
O‘FA, o‘zbek futboli jamoatchiligi va muxlislar nomidan Odil Ahmedovga uzoq yillik faoliyati uchun minnatdorchilik bildiramiz.
Odil Ahmedovning mamlakatimiz futbolini rivojlantirish borasidagi keyingi rejalarida ulkan muvaffaqiyatlar tilaymiz. Umid qilamizki, u keyingi faoliyatida ham futbolimiz dovrug‘ini oshirishga o‘z hissasini qo‘shishda davom etadi.
