Xabar berganimizdek, Bekobodning “Metallurg” jamoasi yangi mavsumga tayyorgarlikni boshladi. Dastlabki yig‘in kuniyoq jamoada bir qator juz’iy o‘zgarishlar bo‘lganligini kuzatish mumkin. Jamoaning o‘tgan yilgi asosiy tarkibi o‘zagi saqlab qolingani holda yangilanish sari katta qadam tashlanganligini payqash qiyinmas. Avval ma’lumot berganimizdek, klub rahbariyati jamoaga bir qator yangi o‘yinchilarni taklif etdi. Ular orasida Fozil Musayev, Islombek Isoqjonov, Abbos Otaxonov, Hakimxon Alamxonov, Shohnazar Norbekov, Ergash Ismoilov, Zabihillo O‘rinboyev, Ixtiyor Toshpo‘latov singari tajribali o‘yinchilar qatorida ko‘rikka taklif etilgan yangi nomlarni ham uchratish mumkin. Yangi mavsumda “Metallurg” sharafini himoya etuvchi yakuniy tarkib esa qishki o‘quv-mashg‘ulot yig‘ini siklida aniqlab boriladi.

O‘z o‘rnida bir necha mavsum “Metallurg” sharafini himoya etgan bir qator o‘yinchilar bilan klub do‘stona xayrlashganini ham aytib o‘tish joiz. Yangi mavsum arafasida faoliyatini boshqa klublarda davom ettirishni ixtiyor etgan Akbar Ismatullayev, Kamoliddin Tojiyev, Stanislav Andreev, Akmal Tursunboyev, Muhammad Isayev, Ivan Nagayev, Abdurahmon Abdulhaqov, Shahzodbek Nurmatov, Dilshod Rahmatullayev, Bobir Davlatov, Mahmudjon Qudratillayev, Ruslan Roziyev hamda murabbiylar Anatoliy Kurlayev va Petr Gizimchuklarga “Metallurg” PFK rahbariyati, ko‘p ming sonli muxlislari nomidan minnatdorchilik bildiramiz. Ularga Bekoboddagi samarali hamkorliklari uchun tashakkur izhor etgan holda keyingi faoliyatlarida omad yor bo‘lishini tilaymiz.