Kecha chiqqan xabarlardan e’tiborimni tortgani Pol Pogbaning “MYU” mashg‘ulotlariga qaytgani bo‘ldi. Garchi bungacha fransiyalik futbolchi jamoasini o‘zgartirishni istayotgani, masalan Parijga ko‘chgisi borligi haqida ham turli xabarlar chiqib turgan bo‘lsada, hozirgi jamoasi uchun u juda kerak.

Joriy mavsumda u o‘zi o‘tkazgan 9 ta o‘yinda 7 assist muallifiga aylangan (ulardan 4 tasi bir o‘yinda ekani ham bor gap). Yana ko‘pincha Pogbaning yaratuvchi sifatlari diqqat markazida bo‘lib, uning yaxshigina shakllangan tayanch futbolchisi sifatidagi fazilatlari unitiladi. Krishtianu Ronalduning transferidan so‘ng menimcha maydonda Pol Pogba singari futbolchiga ehtiyoj bir necha karra ortdi.

Klubdagi yarim himoyachilariga qarab turib ularda ikki xislat mutanosib deyish qiyin. Tayanchda o‘ynashi mumkinlari-ku, umuman yaratishga moyil emas – Matich, Fred, Maktominay. Bular asosan qattiq yuklama bilan ishlovchi, ko‘proq buzishga moyil futbolchilar. Hujum chog‘i ulardan keskinlashtiruvchi, kreativ qarorlar kutish qiyin. Bunday holda Pol kabi futbolchi markazdagi balans uchun juda zarur. Deylik, u yaxshi formada bo‘lsa istalgan toza tayanch yarim himoyachisi bilan markazda juftlik bo‘la oladi. Bu juftlik esa istalgan boshqa ko‘rinishdagi juftlikdan ko‘ra himoya-hujum funksiyalarida samaraliroq bo‘ladi. Ya’ni hozirgidek tayanchda bir-biriga o‘xshash ikki futbolchi ayni vaqtda maydonda bo‘lganidan ko‘ra, farqli futbolchi harakat qilgani ma’qul menimcha. Faqat Pogba bilan shunday farqli juftlik shakllanishi mumkin. Keyin to‘rt himoyachi bilan boshlanadigan istalgan sxemada hujumdagilar uchun komfort hosil bo‘lsa kerak. Har holda Ronaldu ishtirokidagi ilk o‘yinda shunday bo‘lgandi.

Menimcha, ba’zida rebusdagi ayrim murakkab ramzlarni aniqlash uchun undan avval yoki keyin turgan osonroq ramzni aniqlab olish lozim.

Orif Tolipov.