Avvalgi hafta futboldagi eng kulgili lahzalardan biri KONKAKAF miqyosidagi JCH-2022 saralash bosqichida kuzatildi. Panama va Kosta-Rika terma jamoalari o‘rtasidagi o‘yin. Ikkinchi bo‘lim o‘rtalari. Hisob - 0:0. Shu pallada panamaliklar o‘z darvozalari oldida yuzaga kelgan standart vaziyatni bartaraf etish asnosida chiroyli qarshi hujumga o‘tishdi. Biroq samarasiz...
Tom ma’noda aytsak, bitta chiroyli uzatma Kosta-Rika termasining deyarli barcha maydon o‘yinchilarini vaziyatdan uzib qo‘ydi. Aniqroq aytsak, bir himoyachidan tashqari, hamma «ish»siz qoldi. Vaziyat ichida qolgan shu yagona futbolchiga ham Panama termasining naq 5 nafar vakili qarshi chiqdi! Ajoyib imkoniyat! Biroq panamaliklardan biri negadir birdan yugurishdan to‘xtadi. Ko‘rinishidan, u 4 nafar jamoadoshi ishni bemalol do‘ndirib qo‘yishini o‘yladi, chog‘i. Ammo bir zumda Kosta-Rika termasining yana futbolchisi ortga qaytishga ulgurdi va hujum bilan himoya o‘rtasidagi nisbat 4ga 2 ko‘rinishiga keldi.
Qarangki, panamaliklar shunday takrorlanmas hujumni besamar yakunlashdi - to‘pni maydon markazida qabul qilgan futbolchi uni chamasi 30 metrga «sudrab» bordi va sherigiga uzatdi. Kosta-Rika termasi jarima maydonidagi o‘sha yagona himoyachi esa to‘pni olib qo‘ydi. Bundan jahli chiqqan panamalik futbolchi uni ushlab oldi. Shu tariqa hujum xotima topdi. Yakunda Panama termasi 0:1 hisobida imkoniyatni boy berdi. To‘g‘ri, jamoa turnir jadvalining 4-qatorida qoldi, ammo bu turga qadar ochko bo‘yicha teng borayotgan Meksika termasi oldinga o‘tib ketdi. Asosiy masala shuki, KONKAKAF saralash guruhida dastlabki 3ta pog‘ona egasi to‘g‘ridan-to‘g‘ri yo‘llanma olsa, to‘rtinchi jamoa qit’alararo «pley-off» bahsida ishtirok etadi.
