Аввалги ҳафта футболдаги энг кулгили лаҳзалардан бири КОНКАКАФ миқёсидаги ЖЧ-2022 саралаш босқичида кузатилди. Панама ва Коста-Рика терма жамоалари ўртасидаги ўйин. Иккинчи бўлим ўрталари. Ҳисоб - 0:0. Шу паллада панамаликлар ўз дарвозалари олдида юзага келган стандарт вазиятни бартараф этиш асносида чиройли қарши ҳужумга ўтишди. Бироқ самарасиз...
Том маънода айтсак, битта чиройли узатма Коста-Рика термасининг деярли барча майдон ўйинчиларини вазиятдан узиб қўйди. Аниқроқ айтсак, бир ҳимоячидан ташқари, ҳамма «иш»сиз қолди. Вазият ичида қолган шу ягона футболчига ҳам Панама термасининг нақ 5 нафар вакили қарши чиқди! Ажойиб имконият! Бироқ панамаликлардан бири негадир бирдан югуришдан тўхтади. Кўринишидан, у 4 нафар жамоадоши ишни бемалол дўндириб қўйишини ўйлади, чоғи. Аммо бир зумда Коста-Рика термасининг яна футболчиси ортга қайтишга улгурди ва ҳужум билан ҳимоя ўртасидаги нисбат 4га 2 кўринишига келди.
Қарангки, панамаликлар шундай такрорланмас ҳужумни бесамар якунлашди - тўпни майдон марказида қабул қилган футболчи уни чамаси 30 метрга «судраб» борди ва шеригига узатди. Коста-Рика термаси жарима майдонидаги ўша ягона ҳимоячи эса тўпни олиб қўйди. Бундан жаҳли чиққан панамалик футболчи уни ушлаб олди. Шу тариқа ҳужум хотима топди. Якунда Панама термаси 0:1 ҳисобида имкониятни бой берди. Тўғри, жамоа турнир жадвалининг 4-қаторида қолди, аммо бу турга қадар очко бўйича тенг бораётган Мексика термаси олдинга ўтиб кетди. Асосий масала шуки, КОНКАКАФ саралаш гуруҳида дастлабки 3та поғона эгаси тўғридан-тўғри йўлланма олса, тўртинчи жамоа қитъалараро «плей-офф» баҳсида иштирок этади.
