Ko‘pchilik braziliyalik Ronaldo deganda 2002 yilda JCH to‘purari bo‘lib, «Oltin to‘p»ni qo‘lga kiritgan, «Real»da ko‘p gollar urgan Ronaldoni eslashadi. Yoshroq avlod, ayniqsa. Keyin o‘sha paytlarga kelib, translasiyalar ancha rivojlanib qolgandi. Yo‘q, u Ronaldo haqiqiysi emas, haqiqiysi, 1996-99 yillardagi Ronaldo. Bir yutubga kirib o‘sha davrdagi Ronaldoning videolarini ko‘ring. Unaqasi bo‘lmagan.

Messi va Ronaldu eng muhimi, barqarorlik bilan, uzoq yillar yuqori tempni ushlaganlari bilan shu cho‘qqiga chiqishgan, gap yo‘q. Lekin ma’lum bir qisqa davrda eng yaxshi futbolchi yoki kimnidir faoliyatidagi cho‘qqi haqida gap ketganda, men braziliyalik Ronaldoni va Fransiyadagi jahon chempionatini eslayveraman.

O‘shanda, yarim finalda Ronaldoning bir o‘zi Niderlandiya terma jamoasi himoyasiga qarshi qanday harakat qilganini aytishim shart emas, buni ko‘rish kerak. Undan ham ahamiyatlisi, final – Ronaldo va uning sheriklari Fransiyaga qarshi hech narsa qila olmagan va 0:3 hisobida yutqazgan final.

Ha, o‘shanda Ronaldo hech narsa qila olmagandi. Bu futbol olami uchun juda g‘alati tuyulgan, juda ko‘p mish-mishlar chiqib ketgandi. Ronaldo sotilibdi, Ronaldoni o‘yindan oldin zaxarlashibdi, Ronaldo kasal bo‘lib qolibdi va hokazo.

Qanchalik rost, qanchalik asosli, esimda yo‘q, jiddiy nashrlar ham yozishganligini eslayman. Qizig‘i, bunday xabarlarni hamma axtargan. Internet hozirgidek emas, ma’lumotlarning tarqalish prinsiplari butunlay boshqacha, to‘g‘ri, lekin baribir, Ronaldoning o‘ynay olmasligi (aslida butun Braziliya o‘ynay olmagan) ortida futboldan tashqari nimadir borligiga ishonchimiz komil edi negadir. Axir, shunchaki futbolchining o‘yini chiqmasligi, himoyachilar uni yaxshiroq qo‘riqlashlari ham mumkin-ku, to‘g‘rimi?

Messi yoki Ronalduning muvaffaqiyatsiz o‘yinlarini ko‘p ko‘rganmiz. Hatto ular o‘zlarining eng yaxshi mavsumini o‘tkazayotgan paytlarda ham. Tabiiy va oddiy holat. Bo‘lib turadi. Ular ham odam.

Lekin braziliyalik Ronaldo haqida unday o‘ylashmasdi.