Kongolik himoyachi Shansel Mbemba yaqin orada «Portu» bilan xayrlashsa kerak. Oddiy xabar, shundaymi? Lekin tafsilotlari bilan tanishishgach, hayratdan yoqa ushlashingiz hech gap emas. Hammasiga afrikalik futbolchilar bilan ko‘p uchraydigan holat sabab. Qisqasi, Mbembaning yoshi pasportida yozilganidan kattaroq ekan.
Odatda bunday xabarlar ko‘pincha mish-mish darajasida qolib ketadi, lekin bunisi ancha jiddiy ko‘rinadi. Corriere de Manha nashri ma’lumotiga qaraganda, Shansel shartnomasining qolgan muddati (yana 6 oy bor)ni xotirjam o‘tashi mumkin, keyin klubdan ketadi. Agar Mbemba asosiy tarkibning «temir» futbolchisi bo‘lmaganida, ehtimolki, «Portu» o‘rtadagi bitimni darhol bekor qilardi.
Hujjatlar bo‘yicha aytsak, Shansel 27 yoshda. Bu markaziy himoyachi uchun faoliyatidagi eng yaxshi davr hali oldinda ekanligini anglatadi. Ammo Portugaliya OAV vakillari Mbemba do‘stlari bilan aloqa o‘rnatish asnosida uning 1990 yili tug‘ilganini aniqlashdi. Demakki, u 27 emas, 31 yoshda. Bu hali hammasi emas. Chunonchi, Mbembaning yoshi mavzusi ancha oldin bahs-munozara doirasiga tushgan. Diqqat qiling, kongolik futbolchining qachon tug‘ilgani borasida naq 4ta (!!!) taxmin mavjud:
1994 yil 8 avgust - pasportida ko‘rsatilgan sana. Unga ko‘ra, futbolchi 27 yoshda;
1990 yil 8 avgust - do‘stlari aytgan va OAVda e’lon qilingan sana. Unga ko‘ra, futbolchi 31 yoshda;
1988 yil 8 avgust - Mbemba o‘ynagan Kongo klublari hujjatlarida ko‘rsatilgan sana. Unga ko‘ra, futbolchi 33 yoshda;
1991 yil 8 avgust - 2011 yilda Afrika kubogi saralash o‘yini uchun berilgan qaydnomada ko‘rsatilgan sana. Unga ko‘ra, futbolchi 30 yoshda.
Aynan oxirgi variant-taxmin yuzaga chiqishi bilan Shanselning yoshi haqidagi bahs-munozaralar boshlandi. Keyinchalik Kongo futbol federasiyasi rasmiylaridan biri Mbambega Olimpiada-2012 saralashida ishtirok etish imkoniyatini yaratish uchun uning tug‘ilgan sanasi o‘zgartirilganini rasman tan oldi. Umuman, Mbemba faoliyatidagi eng katta voqea - bu uning 12 million yevro evaziga «Anderlext»dan «Nyukasl»ga o‘tgani. O‘shanda asl yoshini aniqlash uchun Shanselni suyak to‘qimalarini tahlil qilish jarayoniga jalb etishgan. E’tiborlisi, tekshiruv bo‘yicha Mbemba aynan pasportida ko‘rsatilgan sana - 1994 yili tug‘ilgani tasdiqlangan. «Suyak to‘qimalari tahlili haqiqiy yoshimni ko‘rsatib qo‘ydi. Bunga qadar juda ko‘p alamli so‘zlar eshitdim, xayriyatki, barchasi rasman tasdiqlandi, ortiqcha taxmin-farazlarga o‘rin qolmadi. Yaqinlarim, do‘stlarim va Kongodagi barcha tanishlarim 1994 yilning 8 avgust kuni tug‘ilganimni bilishadi. Shunchaki, ba’zida hasadchilar ayrimlarning muvaffaqiyatini ko‘rolmaydilar va ularning obro‘lariga putur yetkazishni o‘ylaydilar», - degandi himoyachi tekshiruv natijalari e’lon qilinganidan so‘ng.
Aftidan, Shanselning barcha do‘stlari uning haqiqiy yoshini bilishmaydi yoki Portugaliya matbuoti «bechora» himoyachiga qarshi. Aytgancha, hozirgi mashmashalar Mbemba faoliyatiga salbiy ta’sir etishi hech gap emas. Axir unga «Milan» jiddiy qiziqayotgandi, biroq endi italiyaliklar «etti o‘lchab, bir kesish»lari tayin. Chunki Shansel biografiyasida bahsli tafsilotlar juda ko‘p...
