Avval xabar berganimizdek, O‘FA, O‘zPFL va O‘zbekiston Futbolchilar uyushmasi vakillari o‘rtasida futbolchilarning maqomlarini belgilash, transferlardagi muammolarini bartaraf etish va tartibga solish maqsadida reglament loyihasi ustida ish olib borilmoqda.
Futbolchilarning manfaatlarini himoya qilish uchun huquqiy normativning yo‘qligi bir qator muammoli vaziyatlarni keltirib chiqarishi mumkinligini ko‘rsatib bermoqda. Bugungi bo‘lib o‘tgan yig‘ilishda aynan shu mavzuda so‘z bordi. Xususan, suhbat davomida futbolchilarning huquqlarini himoya qiluvchi qo‘mita tashkil etish masalasi muhokama qilindi. Yig‘ilishda qatnashgan sport huquqshunoslari bu borada taklif va fikrlarini bildirib o‘tishdi. Mazkur qo‘mita, shuningdek, futbolchilarning boshqa klubga o‘tish vaqtidagi qiyinchiliklar va klub-futbolchi o‘rtasidagi yuzaga kelishi mumkin bo‘lgan muammolarni bartaraf etishi ko‘zda tutilmoqda. Ayniqsa shartnomalar borasidagi nizolarni bartaraf etish uchun xalqaro tajribani o‘rgangan holda maxsus palata tashkil etish taklifi ilgari surildi.
Mazkur qo‘mita ustavi, vazifa va tuzilmasi navbatdagi yig‘ilishlarda qayta ko‘rib chiqilishi belgilandi.
