«Manchester Siti» bosh murabbiyi Xosep Gvardiola «Sporting»ga qarshi Chempionlar ligasi 1/8 final javob uchrashuvi oldidan o‘z fikrlarini bildirdi.
«Biz butun jamoa himoya va hujumda ishtirok etishini istaymiz. Nega so‘nggi o‘yinda Kevin de Bryuyne "Manchester Yunayted" darvozasiga ikkita gol urdi? Chunki u o‘sha yerda edi. Portugaliyada birinchi golni urganimizda nima uchun Kevin Riyod Mahrezdan o‘tib ketdi? Chunki u o‘sha yerda edi, gol urish uchun kerakli joyda bo‘lishingiz kerak.
Birinchi o‘yindan so‘ng men 5:0 hisobidagi natija haqiqatni yoki jamoalar o‘rtasidagi farqni aks ettirmasligini aytdim. Biz shunchaki tezda gol urishga muvaffaq bo‘ldik. Biz to‘rtta zarba berdik va to‘rtta gol urdik. Bu ba’zida sodir bo‘ladi. Natija shunday bo‘lganda, hamma narsa juda oddiy ko‘rinadi. Lekin men «Sporting»ni va ular qilayotgan ishlarini juda hurmat qilaman”, — dedi Gvardiola UYEFA rasmiy saytiga.
