«PSJ» joriy mavsum barqaror emas yoki jamoa o‘ta xotirjam. Har holda, parijliklar CHL 1/8 finali dastlabki o‘yinida «Real»ni qabul qilib, yagona gol evaziga ustun kelishdi, keyin Liga 1da «Nant» mehmoni bo‘lib, 1:3 hisobida yutqazishdi. Boz ustiga, jamoa Nantda birinchi bo‘limning o‘zida 3ta javobsiz gol qo‘yib yubordi. Endi «Real» bilan bahsdagi bitta vaziyat keng muhokama qilinmoqda...
CHL o‘yini. Raqib - «Real». Hisob - 0:0. «PSJ» futbolchilari navbatdagi hujumda burchak zarbasi tepish huquqini qo‘lga kiritishdi. Biroq ijro u qadar yaxshi chiqmadi, raqib to‘pni jarima maydoni tashqarisiga tepib yubordi. Kamiga madridliklar tezkor qarshi hujumga o‘tib ketishdi. Lionel Messi esa oldinga intilgan Vinisius Juniorni to‘xtatishga unchalik uringani ham yo‘q. Boz ustiga, argentinalik yulduz braziliyalik raqibini o‘tkazib yuborganidan keyin ham, uning ortidan yugurishni xohlamadi. Leo shunchaki, «piyoda» yurdi, go‘yo. Ayni shu holat Danilu Pereyruning g‘azabini qo‘zg‘atdi. Portugaliyalik himoyachi avvaliga Vinisiusni to‘xtatish uchun taktik qo‘pollik qilishga majbur bo‘ldi va buning uchun hakamdan sariq kartochka oldi. U shundan so‘ng Messiga qarata o‘shqirdi. RMC Sport yaqinda «Portu»ning sobiq vakili argentinalik futbolchi «o‘yindan chiqib qolgan vaziyat»ga qanday g‘azab bilan munosabat bildirgani aks etgan videolavhani videoda oshkor qildi. Ha, «PSJ»da Leoning hurmatini joyiga qo‘yishmayapti, chog‘i.
Umuman, o‘sha o‘yin Messi uchun muvaffaqiyat keltirmadi - argentinalik yulduz penaltidan foydalanolmay, «Real»ga qarshi o‘yinlardagi golsiz seriyasini davom ettirdi, L~Equipe nashri esa uni maydondagi eng sust futbolchilardan biri sifatida ko‘rsatdi. To‘g‘ri, «PSJ» baxtiga Kilian Mbappe so‘nggi lahzalarda g‘alaba golini urdi.
Munosabat
- «PSJ» libosidagi Messini ko‘rsam, chinakamiga achinyapman. Hamma uning barchasini o‘z qo‘liga olib, «Barselona»dagi karomatlarini takrorlashini xohlaydi. Yo‘q, hozir Messi va Mbappeni o‘zaro taqqoslashni istamayman. Oxirgi bir necha oyki, bir qirol o‘rniga boshqasi tiklanayotganini kuzatyapmiz. Hozirgi Messi «Barsa»da o‘ynaganining soyasi, xolos... Emmanuel Peti («Arsenal»-ning sobiq hujumchisi).
- Bu gapim bilan jinnidek ko‘rinarman, ammo o‘ylashimcha, deylik, Ben Arfa hech bir jabhada Messidan yomon emas. Takrorlayman, Atem o‘zining eng yaxshi sport formasida - bu Messi. Jibril Sisse («Liverpul»ning sobiq hujumchisi).
- Messi bo‘shashmoqda. U boshini tobora pastlamoqda, maydonda piyoda yurmoqda va o‘yin natijasiga ta’sir ko‘rsatolmayapti. Le Parisien (Fransiya nashri).
- Messidek futbolchini tanqid qilish mumkin emas. Kim shunday qilsa, u futbolda hech narsani tushunmaydi... Karim Benzema («Real» hujumchisi).
