Fransiyalik sobiq futbolchi Nikolya Anelka ikki yulduz — Lionel Messi va Krishtianu Ronaldu haqida o‘z fikrlarini bildirib o‘tdi.

«Ular 15 yilda erishgan yutuqlaridan qoniqish hosil qilgan bo‘lsalar kerak. Ronaldudan ko‘ra meni ko‘proq Messi hayron qoldirdi. Leo Fransiya chempionatida maydon bo‘ylab shunchaki piyoda yursa kerak, Ronaldu esa APLda qiynalsa kerak deb o‘ylagandim. Chunki premyer-liga murakkab chempionat.

Futbolda bunchalik uzoq vaqt hukmronlik qiladigan o‘yinchilar bo‘lishiga ishonmayman. Ular 15 yil davomida boshqalardan oldinda bo‘lishdi. Hozir ularning o‘yinida pasayish ro‘y berayotgani normal holat.

Uzoq vaqt davomida o‘ynashni istagan har qanday futbolchi bilan bunday holat ro‘y beradi. Ular biroz aqlli bo‘lgan holda o‘zlariga: «Osonroq sinovni qabul qilganim yaxshiroq», deyishlari kerak edi.

Faoliyatining cho‘qqisida futbolni tugatish uchun to‘g‘ri qaror qabul qilish kerak. 32-34 yoshda futbolni tamomlaydigan o‘yinchilar bor. Tanqidlarga uchramasdan avval cho‘qqida yakunlash kerak. Men 36 yoshimda futbolni tugatdim, ammo 32 yoshimda Xitoyga jo‘nab ketdim», – dedi «Chelsi» klubi sobiq o‘yinchisi.