«Lester» yarim himoyachisi Yuri Tilemans «Arsenal»ga o‘tishi mumkin, deya xabar beradi The Sun.

Britaniya nashri xabariga ko‘ra, «Arsenal» rahbarlari 2022 yilning qishida Tilemans vakillari bilan London klubiga o‘tish borasida muzokara o‘tkazgan.

Ayni paytda, «Manchester Yunayted» ham 24 yoshli belgiyalik futbolchini o‘z tarkibiga qo‘shib olishni mo‘ljallamoqda. Manbaning ta’kidlashicha, «qizil iblislar» «Vest Xem» yarim himoyachisi Deklan Raysning transfer narxi yuqori bo‘lgani uchun uni qo‘lga kiritishdan voz kechgan.

Tilemansning ingliz klublaridan biriga transferi shu yozda amalga oshishi mumkin, sababi belgiyalik avvalroq «Lester» bilan shartnomasini uzaytirish niyatida emasligini malum qilgan edi.

Futbolchining jamoa bilan amaldagi shartnomasi 2023 yilning yoziga qadar amal qiladi. Transfermarkt xabariga ko‘ra, belgiyalik futbolchi transfer bozorida 55 mln yevroga baholangan.