«Barselona» hujumchisi Rafinya Ispaniya chempionatining ketma-ket ikki turida uchtadan gol urdi va La Liga tarixidagi kamyob natijani takrorlash arafasida turibdi.
Braziliyalik futbolchi «Rasing»ga qarshi 7:2 hisobidagi g‘alabada uchta, «Sevilya»ga qarshi 3:1 hisobidagi bahsda esa yana uchta gol urdi.
La Liga tarixida faqat ikki futbolchi ketma-ket uchta uchrashuvda xet-trik qayd etishga muvaffaq bo‘lgan. Bular — 1934/35 yilgi mavsumda «Ovyedo» safida to‘p surgan Isidro Langara hamda 1946/47 yilgi mavsumda «Atletik» vakili Telmo Sarra.
Shuningdek, Rafinya 2017/18 yilgi mavsumda «Atletiko»da o‘ynagan Antuan Grizmanndan keyin La Ligada ketma-ket ikki uchrashuvda xet-trik qayd etgan birinchi futbolchi bo‘ldi. Ispaniya chempionati tarixida bunday holat Rafinyagacha 29 marta kuzatilgan.
«Barselona» futbolchilari orasida esa ketma-ket ikki o‘yinda xet-trik qayd etish avval faqat Lionel Messi (uch marta) va Luis Suaresga nasib qilgan.
Milliy terma jamoalar o‘yinlari uchun tanaffusdan keyin «Barselona» o‘z maydonida «Xetafe»ni qabul qiladi.
