«Барселона» ҳужумчиси Рафинья Испания чемпионатининг кетма-кет икки турида учтадан гол урди ва Ла Лига тарихидаги камёб натижани такрорлаш арафасида турибди.

Бразилиялик футболчи «Расинг»га қарши 7:2 ҳисобидаги ғалабада учта, «Севилья»га қарши 3:1 ҳисобидаги баҳсда эса яна учта гол урди.

Ла Лига тарихида фақат икки футболчи кетма-кет учта учрашувда хет-трик қайд этишга муваффақ бўлган. Булар — 1934/35 йилги мавсумда «Овьедо» сафида тўп сурган Исидро Лангара ҳамда 1946/47 йилги мавсумда «Атлетик» вакили Тельмо Сарра.

Шунингдек, Рафинья 2017/18 йилги мавсумда «Атлетико»да ўйнаган Антуан Гризманндан кейин Ла Лигада кетма-кет икки учрашувда хет-трик қайд этган биринчи футболчи бўлди. Испания чемпионати тарихида бундай ҳолат Рафиньягача 29 марта кузатилган.

«Барселона» футболчилари орасида эса кетма-кет икки ўйинда хет-трик қайд этиш аввал фақат Лионель Месси (уч марта) ва Луис Суаресга насиб қилган.

Миллий терма жамоалар ўйинлари учун танаффусдан кейин «Барселона» ўз майдонида «Хетафе»ни қабул қилади.