Kimlargadir tanish, yana kimlar uchundir begona bo‘lgan "o‘n ikkinchi o‘yinchi" iborasi nimani anglatadi o‘zi? Javob oddiy, o‘n ikkinchi o‘yinchi — maydon tashqarisidagi alohida bir jamoadir, bu muxlislar jamoasi. Agar siz kitobni PDF shaklida telefon yoki boshqa elektron uskuna orqali o‘qisangiz (sizning uskunangiz qanchalik zo‘r bo‘lmasin) baribir qog‘oz kitobni o‘qigandek bo‘lmaysiz. Chunki, (qog‘oz) kitobning o‘zgacha ifori, varaqlarining shitirlashi kishining zavqini keltiradi. Muxlislik ham xuddi shunday.Siz uyingizda ham xuddi shu o‘yinni ko‘rishingiz mumkin, lekin siz maydondagi adrenalin, muxlislarning suyuklilarini qo‘llab-quvvatlashi, futbolchilar ko‘rsatayotkan shiddat va temir butsalar ostida bosh ko‘tarib turgan maysalarning iforidan bebahra qolasiz.
Endi qad rostlab kelayotgan novda suvga qanday muhtoj bo‘lsa, futbolchilar ham muxlislarga shunchalik muhtojdir. "Barcelona" yulduzi Pedri "Galatasaroy"ga qarshi o‘yindan so‘ng intervyusida ajoyib bir gapni aytib o‘tdi: "Men umrimda hali bunchalik bosim (muxlislar bosimi) ostida o‘ynamaganman". "Galatasaroy" "Barcelona"ni ellik ming kishi bilan to‘lib-toshgan maydonda "Jahannamga xush keldingiz" deb yozilgan "bannerlar" bilan kutib oldi. Ta’kidlab o‘tish joizki, "Barcelona" bu katta qozonda yaxshigina qovurildi, qiyinchiliklarga duch keldi.
Bundan 2 kun avval O‘zbekiston milliy jamoasi "Navruz Cup-2022" musobaqasida ishtirok etdi va qo‘shni Qirg‘iziston terma jomoasi ustidan qiyin g‘alabaga erishdi. G‘alabaga sabab bo‘lgan asosiy omil bu — SIZ, ya’ni muxlislar deyilsa mubolag‘a bo‘lmaydi! Chunki, Qirg‘iziston o‘yinni boshida hisobni ochib olgach chuqur himoyalanishga o‘tdi. Bu esa har qanday jamoani tinkasini quritadi. Qirg‘izlar 2 qavatli himoya orqali juda tartibli o‘yin ko‘rsatishdi. Futbol atamasi bilan aytilsa "avtobus" qo‘yishdi. Bunday chuqur himoyani yorib o‘tish juda katta kuch talab qiladi. Lekin futbolchilarimiz toliqishmadi, "Markaziy" stadionidagi muxlislar ularni toliqtirishmadi. Futbolchilar yigirma ikki ming muxlis qarshisida mag‘lub bo‘lishga haqqi yo‘q ekanligini tushunib yetishdi. Natijada ularni tashlab qo‘ymagan muxlislar uchun naqd uchta golni tortiq qilishdi.
Angliya yashil maydonlarida, garchi jamoa yirik hisobda yutqizayotgan bo‘lsa-da, muxlislar o‘yinning oxirigacha qo‘llab-quvvatlashda davom etishadi. Futbolchilar esa hisobni tenglashtira olishga kuchlari yetmasligini bilsalar ham, o‘z muxlislari uchun bor-budini tashlaydi. Hozirda futbol taraqqiy etgan davlarlarni barchasida "o‘n ikkinchi jamoa" juda yaxshi ishlaydi, shuning uchun ularda futbol ham yuqori darajada.Olinadigan xulosa shuki: Futbol — muxlislar uchun o‘ynaladigan o‘yindir! Bu o‘yinni siz va biz rivojlantiramiz!
Avazbek Mirsaitov
