Sportni rivojlantirish vaziri Adham Ikramov va O‘FA birinchi vise-prezidenti Ravshan Ermatov boshchiligidagi mutaxassislar hududlardagi futbol ommaviyligini oshirish, bolalar-o‘smirlar futbolini yanada rivojlantirish bo‘yicha amalga oshirilayotgan ishlar, shuningdek kelajakda Navoiy viloyatida futbol bazasi va futbol akademiyalarini tashkil qilish bo‘yicha rejalash bilan tanishish maqsadida Navoiy viloyatiga tashrif buyurishdi.
Tashrifning dastlabki qismida viloyatdagi futbol akademiya hamda bazaning faoliyati bilan yaqindan tanishildi. Mas’ullar bilan bo‘lgan suhbatda ushbu dargohlarning kelgusi qurilish-loyihalarini jadallashtirish, sifatli futbol maydonlarini barpo etish, inshootlarning yotoqxona va oshxonalarini zamon talablariga mos ravishda jihozlash, shuningdek, Yevropa akademiyalari kabi barcha talablarga javob beradigan sharoitlarni tashkillashtirish bo‘yicha topshiriqlar berildi.
Shundan keyin bolalar-o‘smirlar maktabining faoliyati, infratuzilmasi va mavjud shart-sharoitlari ko‘zdan kechirildi. Viloyat miqyosida bolalar futbolining infrastrukturasi yuzasidan fikr almashildi.
Shuningdek, O‘FA birinchi vise-prezidenti viloyatda davom etayotgan «DXX raisi kubogi-2022» musobaqasining uchrashuvlariga tashrif buyurdi. Musobaqa tashkilotchilari va ishtirokchi yoshlar bilan suhbatda ushbu musobaqani tashkil etishdan asosiy maqsad mahalla yoshlari orasidan ham mahoratli futbolchilarni kashf etish va futbol sohasiga layoqati bor yoshlarni tanlab olish ekanligi qayd etildi. Uchrashuv yakunida Ravshan Ermatov musobaqa qatnashchilariga omad tiladi.
