Спортни ривожлантириш вазири Адҳам Икрамов ва ЎФА биринчи вице-президенти Равшан Эрматов бошчилигидаги мутахассислар ҳудудлардаги футбол оммавийлигини ошириш, болалар-ўсмирлар футболини янада ривожлантириш бўйича амалга оширилаётган ишлар, шунингдек келажакда Навоий вилоятида футбол базаси ва футбол академияларини ташкил қилиш бўйича режалаш билан танишиш мақсадида Навоий вилоятига ташриф буюришди.

Ташрифнинг дастлабки қисмида вилоятдаги футбол академия ҳамда базанинг фаолияти билан яқиндан танишилди. Масъуллар билан бўлган суҳбатда ушбу даргоҳларнинг келгуси қурилиш-лойиҳаларини жадаллаштириш, сифатли футбол майдонларини барпо этиш, иншоотларнинг ётоқхона ва ошхоналарини замон талабларига мос равишда жиҳозлаш, шунингдек, Европа академиялари каби барча талабларга жавоб берадиган шароитларни ташкиллаштириш бўйича топшириқлар берилди.

Шундан кейин болалар-ўсмирлар мактабининг фаолияти, инфратузилмаси ва мавжуд шарт-шароитлари кўздан кечирилди. Вилоят миқёсида болалар футболининг инфраструктураси юзасидан фикр алмашилди.

Шунингдек, ЎФА биринчи вице-президенти вилоятда давом этаётган «ДХХ раиси кубоги-2022» мусобақасининг учрашувларига ташриф буюрди. Мусобақа ташкилотчилари ва иштирокчи ёшлар билан суҳбатда ушбу мусобақани ташкил этишдан асосий мақсад маҳалла ёшлари орасидан ҳам маҳоратли футболчиларни кашф этиш ва футбол соҳасига лаёқати бор ёшларни танлаб олиш эканлиги қайд этилди. Учрашув якунида Равшан Эрматов мусобақа қатнашчиларига омад тилади.