O‘zbekiston Coca Cola kubogi guruh bosqichi, 3-turidan o‘rin olgan “Navbahor” – “Neftchi” (2:0) uchrashuvidan keyingi matbuot anjumanining ikkinchi qismida farg‘onaliklar bosh murabbiyi Ilhom Mo‘minjonov qatnashib, jurnalistlarning savollariga javob berdi. Mo‘minjonov so‘zni o‘yin haqidagi fikrlari bilan boshladi.

- Bugungi uchrashuvga jiddiy tayyorgarlik ko‘rgandik. Biz har bir o‘yinga jiddiy yondashamiz. Chempionatdagi omadsiz seriya kubok uchrashuvlarida ham takrorlanib qoldi. Shundan kelib chiqib xulosa qilamiz. Darvozabonimizning qo‘pol xatosi birinchi golga sabab bo‘ldi. Ikkinchi gol standart vaziyatdan urildi. Keyin maydonda 10 kishi bo‘lib qoldik. Har tomonlama xulosa qilgan xolda, Superliga 5-turiga tayyorgarlik ko‘ramiz. “Navbahor”ni g‘alaba bilan tabriklaymiz. Endi bor e’tiborimizni Superliga o‘yinlariga qaratamiz.

- “Navbahor” siz uchun qadrdon klub hisoblanadi. Qachondir “Navbahor”ga qaytish rejangizda bormi? Keyin bugungi mag‘lubiyatga himoyaviy o‘yin sabab bo‘ldi, deb o‘ylaysizmi?

- Shiddatli o‘yin “vodiy derbisi”da kuzatilishi aniq edi. Dastlabki daqiqalarni yaxshi boshladik. Keyinroq raqib o‘yinni o‘zi tomonga bura oldi va kuchli hujumlar tashkil etdi. Xatolar ustida ishlaymiz. Bizda yo‘qotishlar bor.

“Navbahor”ga qaytish haqidagi savolingizga kelsak, yer dumaloq, balki bir kun kelib amalga oshar. Lekin hozir faqat “Neftchi” haqida o‘ylashim lozim. Superligaga jamoani olib chiqdik, endilikda rahbariyat oldimizga qo‘ygan vazifalarni bajarish uchun harakat qilishda davom etamiz.

- Abbos G‘ulomov qanotlarda foydaliroq harakat qilardi. Siz uni markazda o‘ynatayotganingizning sababi nima?

- Markazda Lutfulla To‘rayevning jarohati tufayli muammo bor edi. Shu sababdan uni markazga qo‘ydik. Qanotlarda futbolchilarimiz bor. U hozir Aleksandr Yeshichdan ko‘ra ham markazda yaxshi o‘yin namoyish etmoqda. Doniyor Narzullayev, Umar Adhamzoda kabi futbolchilarimizda ham jarohat bor.

- Hujum chizig‘ida barqarorlik yetishmayotgandek tuyulmoqda. Bunga nima sabab deb o‘ylaysiz?

- Hujum chizig‘ida nomdor futbolchilar bor. Hozirgi futbolda natijani familiyalar hal qilmaydi. Biz mashg‘ulotlarda bu bo‘yicha ishlayapmiz. Muammo ularning o‘zida. Bugungi o‘yindan so‘ng ular yana xulosa qilishadi. Futbolchining o‘zi ishlamasa, uning familiyasi bir tiyin. Ular harakat qilishmoqda, natija berishiga umid qilamiz. “Qizilqum” bilan ham yomon o‘ynamagandik, to‘p nazorati biz tomonda bo‘lgandi. Lekin gol ura olmadik. 4 ta turdan so‘ng 2 ta gol urganmiz, ular ham penaltidan. Kubokda 2 ta gol urdik, bu kam. Biz murabbiylar bu kabi xatolarni bartaraf etish uchun ishlaymiz.

- Mavsumoldi intervyularingizdan birida birinchi turda “Navbahor”ga qarshi o‘ynashni aytgandingiz. Buning sababi nima?

- Bu savolni berganingiz yaxshi bo‘ldi. Bu gapni “Neftchi” bilan o‘yinda stadion to‘lishi uchun aytgandim, lekin to‘lmadi. Baribir 2 mingdan ziyod muxlis keldi.