Bu safar skudetto uchun kurashda jiddiy intriga bor. Daraja haqiqatdan ham yuqori, chunki kurash bir shahar vakillari “Milan” va “Inter” o‘rtasida kechmoqda. Quyida ikki jamoaning imkoniyatlari qanchalik ekanligini tahlil qilamiz.
"Milan"
"Milan" muxlislari jamoa nafaqat Italiyada, balki butun Yevropada kuchli klub bo‘lgan vaqtlarni hayajon bilan eslashadi. O‘shandan beri "rossonerilar" qayta qurishning ko‘plab qiyin davrlarini boshdan kechirishdi, bu davrda jamoani Maldini, Pirlo, Kaka, Shevchenko va boshqa futbolchilar bilan taqqoslash kabi ko‘plab memlar paydo bo‘ldi.
XXIasrda Milan ikki marta Skudettoni qo‘lga kiritdi - 2004 yilda ajoyib tarkib bilan va 2011 yilda Ibra, Robinyo va Pato bilan. Asta-sekin “Milan” o‘rtameyona maqomiga tushdi (2014 va 2015 yillarda 8 va 10-o‘rinlar) va keyin yana yuqoriga ko‘tarila boshladi. O‘tgan mavsumda "Milan" chempionatning birinchi qismini ajoyib tarzda o‘tkazdi va jamoa muxlislari orasida uzoq kutilgan chempionlikka umid chaqnadi. Lekin unday bo‘lmadi. A Seriya yakunlanishidan ancha oldin «Inter» chempionlikni qo‘lga kiritishi aniq bo‘ldi.
Hozir esa “Milan” chempionlik uchun jiddiy kurash olib bormoqda – yanvar-fevralda emas, may oyida. Aynan Stefano Pioli jamoasi hozirda “Inter”dan bir ochko ortda bormoqda. Ammo hamma narsa “Milan”ga bog‘liq. Chunki ular bir o‘yin kam o‘tkazishgan.
Taqvim: “Verona” (safarda), “Atalanta” (uyda), “Sassuolo” (safarda).
"Inter"
Bir yil avval “Inter” 2010 yildan beri ilk bor Italiya chempioniga aylangandi. Antonio Konte xarakterli murabbiy sifatida noldan loyiha qurishni istamadi va jamoaning kelajagi borasida rahbariyat bilan kelishmovchiliklar yuzaga kelganda, lavozimni tark etdi. Konte o‘rniga avvalroq "Lasio"da yaxshi ishlagan Simone Indzagi keldi. Yangi murabbiy bilan "Inter" yana chempionlik uchun kurashmoqda, biroq muxlislar Indzagi haqida turlicha fikrda: kimdir uni yuqori darajaga chiqa oladigan iqtidor deb hisoblasa, boshqalari Konte undan ancha ustunligini aytishmoqda.
“Inter” chempionlik taqdirini o‘z qo‘lida ushlab turishi mumkin edi, biroq yaqinda A Seriyaning qoldirilgan o‘yinida “neradzurri” “Boloniya” mehmoni bo‘lib, 1:2 hisobida mag‘lub bo‘ldi. Endi Simone Indzagi jamoasi “Milan”ning ochko yo‘qotishiga tayanadiva bir vaqtning o‘zida o‘zlari barcha o‘yinda g‘alaba qozonishi kerak. Keling, “Inter”ning o‘yin taqvimi bilan tanishamiz.
Taqvim: “Kalyari” (safarda), “Sampdoriya” (uyda).
Kimning imkoniyati yuqoriroq
A Seriya chempionligini kim qo‘lga kiritishini muhokama qilishdan oldin reglamentning ochkolar tengligi bilan bog‘liq qismiga e’tibor qaratish lozim. A Seriyada ochkolar teng kelib qolgan taqdirda, birinchi o‘rinda o‘zaro o‘yinlar turadi. Demak, “Milan” va “Inter” bir xil ochko to‘plashsa, “rossoneri” chempion bo‘ladi. Neradzurrilar bilan o‘yinlarda 4 ochko (g‘alaba 2:1, durang 1:1) bor.
Taqvimga nazar tashlaydigan bo‘lsak, “Inter” qolgan o‘yinlarda 6 ochkodan 6 ochko oladi degan fikr bor. Simone Indzagi shogirdlarida turnir jadvalida quyida joylashgan jamoalarga qarshi o‘yinlar qoldi. “Milan” o‘rtameyonalar bilan uchta o‘yin o‘tkazadi, shu jumladan, ikkitasi mehmonda. Agar “Verona” va “Sassuolo”da jiddiy motivasiya bo‘lmasa, inqirozdan g‘azablangan “Atalanta” yevrokuboklarga yo‘llanma uchun kurash olib boradi va "Milan"ni "San-Siro"da yengishga intiladi. Qizig‘i shundaki, "Atalanta" oldingi 7 mavsumda A Seriyada safarda "Milan"ga mag‘lub bo‘lmagan.
“Inter”ning nisbatan oson taqvimini hisobga olsak, chempionlik masalasi “Milan” qolgan o‘yinlarda qancha ochko to‘plashi mumkinligi bilan bog‘liq. Stefano Pioli shogirdlari dovdirab qolmasligi va 3 ochko yo‘qotmasligi zarur. Bir yil avval “Inter” so‘nggi 11 yil ichida ilk bor Italiya chempioni bo‘lgandi. Endi “Milan”dan ham xuddi shunday imkoniyat bor.
Mirjalol Pardaboyev tayyorladi.
