Бу сафар скудетто учун курашда жиддий интрига бор. Даража ҳақиқатдан ҳам юқори, чунки кураш бир шаҳар вакиллари “Милан” ва “Интер” ўртасида кечмоқда. Қуйида икки жамоанинг имкониятлари қанчалик эканлигини таҳлил қиламиз.
"Милан"
"Милан" мухлислари жамоа нафақат Италияда, балки бутун Европада кучли клуб бўлган вақтларни ҳаяжон билан эслашади. Ўшандан бери "россонерилар" қайта қуришнинг кўплаб қийин даврларини бошдан кечиришди, бу даврда жамоани Малдини, Пирло, Кака, Шевченко ва бошқа футболчилар билан таққослаш каби кўплаб мемлар пайдо бўлди.
ХХIасрда Милан икки марта Скудеттони қўлга киритди - 2004 йилда ажойиб таркиб билан ва 2011 йилда Ибра, Робиньо ва Пато билан. Аста-секин “Милан” ўртамеёна мақомига тушди (2014 ва 2015 йилларда 8 ва 10-ўринлар) ва кейин яна юқорига кўтарила бошлади. Ўтган мавсумда "Милан" чемпионатнинг биринчи қисмини ажойиб тарзда ўтказди ва жамоа мухлислари орасида узоқ кутилган чемпионликка умид чақнади. Лекин ундай бўлмади. А Серия якунланишидан анча олдин «Интер» чемпионликни қўлга киритиши аниқ бўлди.
Ҳозир эса “Милан” чемпионлик учун жиддий кураш олиб бормоқда – январ-февралда эмас, май ойида. Айнан Стефано Пиоли жамоаси ҳозирда “Интер”дан бир очко ортда бормоқда. Аммо ҳамма нарса “Милан”га боғлиқ. Чунки улар бир ўйин кам ўтказишган.
Тақвим: “Верона” (сафарда), “Аталанта” (уйда), “Сассуоло” (сафарда).
"Интер"
Бир йил аввал “Интер” 2010 йилдан бери илк бор Италия чемпионига айланганди. Антонио Конте характерли мураббий сифатида нолдан лойиҳа қуришни истамади ва жамоанинг келажаги борасида раҳбарият билан келишмовчиликлар юзага келганда, лавозимни тарк этди. Конте ўрнига аввалроқ "Лацио"да яхши ишлаган Симоне Индзаги келди. Янги мураббий билан "Интер" яна чемпионлик учун курашмоқда, бироқ мухлислар Индзаги ҳақида турлича фикрда: кимдир уни юқори даражага чиқа оладиган иқтидор деб ҳисобласа, бошқалари Конте ундан анча устунлигини айтишмоқда.
“Интер” чемпионлик тақдирини ўз қўлида ушлаб туриши мумкин эди, бироқ яқинда А Сериянинг қолдирилган ўйинида “нерадзурри” “Болония” меҳмони бўлиб, 1:2 ҳисобида мағлуб бўлди. Энди Симоне Индзаги жамоаси “Милан”нинг очко йўқотишига таянадива бир вақтнинг ўзида ўзлари барча ўйинда ғалаба қозониши керак. Келинг, “Интер”нинг ўйин тақвими билан танишамиз.
Тақвим: “Кальяри” (сафарда), “Сампдория” (уйда).
Кимнинг имконияти йуқорироқ
А Серия чемпионлигини ким қўлга киритишини муҳокама қилишдан олдин регламентнинг очколар тенглиги билан боғлиқ қисмига эътибор қаратиш лозим. А Серияда очколар тенг келиб қолган тақдирда, биринчи ўринда ўзаро ўйинлар туради. Демак, “Милан” ва “Интер” бир хил очко тўплашса, “россонери” чемпион бўлади. Нерадзуррилар билан ўйинларда 4 очко (ғалаба 2:1, дуранг 1:1) бор.
Тақвимга назар ташлайдиган бўлсак, “Интер” қолган ўйинларда 6 очкодан 6 очко олади деган фикр бор. Симоне Индзаги шогирдларида турнир жадвалида қуйида жойлашган жамоаларга қарши ўйинлар қолди. “Милан” ўртамеёналар билан учта ўйин ўтказади, шу жумладан, иккитаси меҳмонда. Агар “Верона” ва “Сассуоло”да жиддий мотивация бўлмаса, инқироздан ғазабланган “Аталанта” еврокубокларга йўлланма учун кураш олиб боради ва "Милан"ни "Сан-Сиро"да енгишга интилади. Қизиғи шундаки, "Аталанта" олдинги 7 мавсумда А Серияда сафарда "Милан"га мағлуб бўлмаган.
“Интер”нинг нисбатан осон тақвимини ҳисобга олсак, чемпионлик масаласи “Милан” қолган ўйинларда қанча очко тўплаши мумкинлиги билан боғлиқ. Стефано Пиоли шогирдлари довдираб қолмаслиги ва 3 очко йўқотмаслиги зарур. Бир йил аввал “Интер” сўнгги 11 йил ичида илк бор Италия чемпиони бўлганди. Энди “Милан”дан ҳам худди шундай имконият бор.
Миржалол Пардабоев тайёрлади.
