Xabaringiz bor, Qarshi shahrida joylashgan “Markaziy” stadion joriy yilning iyun oyida o‘tadigan U23 Osiyo kubogining muhim uchrashuvlariga mezbonlik qiladi.

Osiyo kubogi Tashkiliy qo‘mita mas’ullari va OFKning tijoriy hamkori Football Marketing Asia (FMA) vakillari Qarshi shahriga tashrif buyurib, ushbu stadionda navbatdagi inspeksiya ishlarini olib bordi.

Mutaxassislar musobaqa davrida tijoriy masalalar hamda reklamalarni joylashtirish talablari va imkoniyatlari, OFKning hamkor va homiylari, tele-translyasiya va media vakillariga yaratib beriladigan sharoitlarni ko‘zdan kechirdi.

Shuni alohida ta’kidlash joizki, yil boshidan buyon O‘zbekiston futbol assosiasiyasi, Qashqadaryo viloyati hokimligi hamda “Nasaf” klubi bosh homiysi “Sho‘rtangazkimyo” majmuasi birgalikda “Markaziy” stadionining infratuzilmasini zamonaviylashtirish, xalqaro turnirlarni qabul qilish talablarga javob beradigan darajaga olib chiqish bo‘yicha keng ko‘lamli ishlarni amalga oshirib kelmoqda.

Xususan, musobaqa taqvimidan kelib chiqib stadionda qo‘shimcha yana ikkita kiyinish xonalari qaytadan rekonstruksiya qilindi va futbolchilar maydonga chiqib kelishi uchun yangi yo‘lak (tunnel) barpo etildi.

Media markaz, media tribuna va qo‘shimcha funsional xonalar qaytadan jihozlandi. Ayni damda yakuniy ta’mirlash ishlari olib borilmoqda va yaqin kunlarda o‘yingoh OFK talablariga muvofiq to‘liq foydalanishga topshiriladi.

Ma’lumot o‘rnida, Qarshi shahrida musobaqaning “B” guruhidan o‘rin olgan beshta o‘yini hamda O‘zbekiston va Eron U23 terma jamoalari o‘rtasidagi qiziqarli uchrashuv bo‘lib o‘tadi.