Superliga 8-turidan o‘rin olgan "Qizilqum" – AGMK (1:4) uchrashuvidan keyin jamoamiz bosh murabbiyi Nikola Lazarevich fikrlarini bildirdi.
- O‘yin haqida
- Natijadan qoniqqanim yo‘q. Shunday bo‘lib qoldi. Lekin bahsga jiddiy tayyorgarlik ko‘rgandik. Individual xatolar tufayli imkoniyatlarimiz yo‘qqa chiqdi. O‘ylaymanki, tashkil etgan vaziyatlarimizdan foydalanganimizda o‘yin umuman boshqacha kechardi.
Raqib hujumi xavfli ko‘rinish olishini bilardik. Ular qarshi hujumga ham yaxshi o‘tishadi. Oxirgi 30-35 daqiqada hech qanday qarshilik ko‘rsata olmadik. Qayerda xato qilganimizni bilish uchun o‘yinni batafsil tahlil qilib chiqishimiz lozim.
- "Qizilqum" legioneri Aleksandar Stanisavlevich umuman yaxshi o‘ynay olmadi. Uning paslari ham juda noaniq ko‘rinish oldi...
- Ha, u bugun yomon ko‘rindi. Biroq u tajribali futbolchi, bir o‘yin taqdirini ham hal qila oladi. Unda qulay vaziyatlar yuzaga keldi, ammo foydalana olmadi. Raqib ikkinchi taymda shunchalik zo‘r o‘ynadiki, jamoamizga hech qanday imkoniyat qoldirmadi.
- Ignatiy Nesterovning o‘yinini qanday baholaysiz?
- Qariyb 40 yosh bo‘lgan posbonimiz shu paytgacha yaxshi o‘ynab kelayotgandi. Bugungi gollarni ko‘rib chiqishimiz kerak. O‘ylaymanki, u katta xatolarga yo‘l qo‘ymadi.
- Shuhrat Muhammadiyevni nega almashtirdingiz?
- Shuhrat charchagan va kichik jarohat olganday tuyuldi. U bir necha kun jarohatini davolab, endigina safga qaytgandi. Shunga almashtirishga qaror qildik.
- Jarohatlangan Erkin Baydullayev va Bobur Yuldashev haqida nima deya olasiz?
- Baydullayev betob bo‘lib qolgan. Shifokorlar unga hozircha o‘ynashga ruxsat berishmadi. Yuldashev ham jarohatda. Umid qilamanki, keyingi gal safda bo‘lishadi.
